祥嫂鬧爆：係咪謀我死呀？
祥嫂（洪金梅）過往曾與鄧兆尊及鄧翠玉（小艾）等仔女發生轟動全港的爭產事件，近日眾人再鬧不和！昨日祥嫂出席活動時表示去年仔女曾求見，逼她簽文件，她激動地說：「做乜要分？係咪謀我死呀？」兆尊對阿媽激動言論則回應：「叫佢咪食咁多唔應該食嘅嘢！」似有所指，祥嫂聞言很大反應：「叫佢講清楚啲！呢句話好多意思喎！」似乎另一場爭產風波又再現暗湧。
已故慈善伶王新馬師曾（鄧永祥）遺孀洪金梅（祥嫂），與四子女於1997年新馬師曾病逝後不久便爆出爭產事件，祥嫂與仔女當年水火不容，鬧得滿城風雨，直至2006年才慢慢和好如初，怎料最近祥嫂再與子女鬧不和，彼此關係極之惡劣，豪門恩怨再度爆發並掀起序幕！
「金錢係萬惡」
昨日祥嫂到錦田出席活動時怒轟仔女，她更指仔女之前曾求見，但都被她拒諸門外，被問是否有人想分家產？祥嫂說：「做乜要分？我都未死！係咪謀我死呀？（仔女想你分？）唔好騷擾我呀！舊年過年前14日，除咗兆榮冇份外，3個仔女嚟到我大宅等我，要我簽文件，係啲授權書，仲抽出嚟要我簽，我驚呀！係咪想標我尾會？起我尾注？害過我喎，我要防呀！（親生仔不如近身錢？）前人係咁講，我要今晚返去諗吓再答你，金錢係萬惡！我已經好少出嚟見大家，就係怕你哋係又問，唔係又問，我嘅瘡疤已經好番，你哋又揭起啲焦！」
「冇事就話我勾佬」
祥嫂更公開挑戰仔女，她說：「仔女？我有生過咩？去年至今冇見佢哋，我都忍辱負重咁耐，唔講就係唔想糟蹋鄧永祥嘅名聲，忍辱18年，忍到我滿身病痛，佢哋想點呀？係咪虐老呀？我係你老母呀！我唔係怕邊個，更加唔會怕我所出嘅，夠膽就出嚟，我公開挑戰佢！（有指鄧小艾曾對外宣稱對你服侍周到？）服侍我乜嘢呀？我行得企得，唔好有事鍾無艷，冇事就話我勾佬，令我好勞氣！」
「我喺鄧家有功有勞」
祥嫂感慨表示：「1995年，我同先夫出席過呢個活動，今日我孤身到嚟，至愛嘅先夫不在，仔女冇出現，好唏噓！（你冇通知鄧兆尊出席？）冇必要咁做，我係長輩！（始終切肉不離皮？）在我嚟講係！（仔女點睇？）我唔可以代答。（為家產問題有意見？）講真，做戲佬又爛賭，搵得來輸得去，有幾多？我講出嚟都怕人笑！（實際有幾多家產？）點知？係1967年暴動嘅時買落啲物業同地係有增值，但唔變賣嘅，點知幾多？總之我名、利、健康，三有！先夫有我呢個老婆先有，乜嘢叫興家旺業？乜嘢叫賢內助？我喺鄧家都叫有功有勞！」
至於事後兆尊對祥嫂一番言論回應：「叫佢唔好食咁多唔應該食嘅嘢！」祥嫂昨晚在電話中說：「吓？呢句說話好多意思喎！啲紅衞兵又有軍師？你去問清楚佢，叫佢講說話清楚啲！」
文：影視組
|
鍾意就快D Share啦！
|
|
|
