聞蔡思貝同校極速做學士 李蘊自認遊魂：讀年幾冇畢業
2013年港姐亞軍蔡思貝被爆涉假學歷，全城譁然，原來李蘊是蔡思貝的師姐，同樣透過國力書院報讀菲律賓比立勤國立大學的工商管理學士課程，然而，現年24歲的李蘊08年會考成績僅4分，當年讀完中五憑4分就「破格」被錄取讀學士，昨日她坦言上堂遊魂：「我讀咗年幾都冇得畢業！」
獲無綫力捧的港姐蔡思貝被爆於2013年選完港姐後，於10月經國力書院報讀菲律賓比立勤國立大學，竟然於同年11月完成19科課程，12月獲頒證書極速畢業。據知，13歲入行的少女組合Cream成員李蘊，原來是蔡思貝的同校師姐，同樣報讀工商管理學士課程，不過，08年會考僅4分的李蘊，只讀完中五憑4分就考到大學，令人匪夷所思！
■擁32C咪咪的李蘊，08年會考憑4分就「破格」被菲律賓比立勤國立大學錄取，昨日她坦言「讀咗等於冇讀！」
資料圖片
【「破格」取錄】
■李蘊昨承認當年透過國力書院，報讀菲律賓比立勤國立大學（圖）的工商管理課程。
【13歲組Cream】
■13歲出道的李蘊（右），當年跟陳曉彤和盧嘉寶成立少女組合Cream。
「返去坐吓咁囉」
昨日李蘊接受本報電話訪問，被問到是否讀菲律賓比立勤國立大學？她說：「係呀，香港一個分學院咁囉。」是否透過國力書院報讀？她承認：「係呀。」對於這所大學傳出是非風波，李蘊說：「唔知喎，當時係經理人幫我申請，讀咗年幾唔夠兩年，其實我冇乜點讀，係公司安排我讀，但自己興趣唔大，有返去坐吓咁囉，但唔係好努力咁讀，所以冇畢業。」
李蘊承認當年會考只得4分，問到4分就入到大學，收生標準是否有問題？她說：「公司幫我報，總之我畢唔到業，讀咗等於冇讀，我比較懶散啲，考試對我嚟講唔易，我咁渣。」
【會考4分】
■08年李蘊會考雖然僅得4分，當日返學校攞成績單時勁得戚。
圖片
每周一堂有考試
問到當時上堂情況，她說：「都好正常，十幾人有個阿Sir喺度教，學生唔同年齡，我比較細啲，有啲30幾40歲，我上堂有啲遊魂，佢一定有傳授知識，我學唔到啫。」覺得老師的水準高嗎？她說：「我唔識評，我學生嚟。」是否每星期返一堂？李蘊說：「係，同埋有測驗考試。」提到蔡思貝被爆疑一個月讀完大學學位，李蘊反問：「係咩？如果係咁我應該畢咗業，唔知係咪𠵱家轉咗模式，以前我就冇得畢喎。」
龍小菌經理人邵子風在facebook的簡歷，寫明2010年畢業於比立勤國立大學，惟昨日忽然刪去學歷資料，他在電話扮儍說：「有寫咩？我fb？」問是否曾就讀這所大學？他說：「係呀，工商管理。」問讀了幾耐攞到學位及為何要刪學歷？他即謂要入𨋢轉頭覆，但再致電給他已關電話。
蔡思貝被爆涉嫌偽造學歷，前港姐譚小環說：「我哋當年學歷都驗過先有得面試。」柳俊江則說：「呢個係好嚴重罪行，喺道德上都要譴責。」十優港姐麥明詩昨說：「我欣賞佢拍劇好努力，可能唔同學位唔同要求。」
採訪：皓騫
|
鍾意就快D Share啦！
|
|
|
