一台獨大令大台每年賺錢賺到數以億計，但賺到盤滿缽滿唔等於手鬆洗得豪。今日就有周刊報道指大台為咗慳皮，今年1月拍嗰部劇集《殭》，除咗幾個主角有自己一對有色隱形眼鏡（扮殭屍用嘅特技隱形眼鏡），其他演員就要共用，哇﹗一啲都唔衞生，最後搞到有演員眼睛有問題。
該周刊報道話《殭》劇開拍時打鑼打鼓，話搵到謝安琪（Kay）做主角，又揼本拉隊去荷蘭取景㖭，但係唔知點解扮殭屍用嘅特技隱形眼鏡，只有主角鄭嘉穎、陳凱琳、謝安琪等，先可以自己擁有一對用，其他配角就要共用。
隱形眼鏡同眼球有緊密接觸，交換配戴有機會細菌互相感染，一啲都唔衞生，據周刊話深受巴打喜愛嘅女神陳瀅（Jeannie），只係客串咗幾集戲，就中咗招喇，真係慘情。
雖然自己對眼有事，但Jeannie就唔知其他共用隱形眼鏡嘅同事有冇唔妥喎。Jeannie同周刊講，佢自己客串咗三集扮殭屍，其實都唔想同人共用嘅，但因為驚阻礙拍攝進度先勉為其難，就用嗰副戴咗之後個瞳孔放大到好以似5蚊銀咁大嘅特技隱形眼鏡。
其實o依家荷李活啲鬼片、殭屍片已用晒電腦特技搞掂，又何須要演員共用隱形眼鏡呢？不過咁，只要大家有睇過《張保仔》同《無雙譜》就知大台啲特技係點喇﹗嗯嗯﹗
|
鍾意就快D Share啦！
|
|
|
