| next 1/1 pre | |
 | |
| 康宏聯席董事卓啟雄指，應該趁後生滾大筆錢。 | next 1/1 pre |
 | |
| 宏利人壽保險分組經理葉嘉輝表示，適當時候要轉工或者進修。 | next 1/1 pre |
向來鍾意行街血併嘅孖妹彩兒同Kitty每個月未到月尾，已經將份糧使得七七八八，堪稱「月光族」。見呢排唔少姊妹都陸續結婚買樓，Kitty與彩兒都想完成呢兩樣人生大事，但自知「釣金龜」無望，所以向兩位同樣三十出頭、已經成家立室嘅猛男請教理財心得，決心開始實行儲錢大計，誓要靠自己擺脫「月月清袋」嘅日子。
卓：康宏聯席董事 卓啟雄(Franky)
彩兒：Franky，睇唔出你三十出頭已經有兩個女，聽講你30歲前已經達成結婚、買樓同生兒育女嘅目標，羨慕死人喇，究竟係點做到？
卓：(哈哈)首先要有個女朋友，有咗結婚對象，然後求婚。我自己有一個好清晰嘅目標，21歲出嚟做嘢，就每月儲起人工某個比例，純為未來買樓結婚之用，一樣嘢如果可以維持到三個月，就會變成習慣，當有咗儲蓄習慣，之後人工慢慢增加，就會愈儲愈多。
Kitty：之不過你一出嚟做嘢就咁努力儲錢，唔係應該趁後生享受人生咩？
卓：啱啱出來做嘢，同屋企人一齊住，經濟負擔唔係太大，唔需要供樓養小朋友，每月應該可以儲到30至40%人工，第時有自己家庭就冇得儲咁多，所以應該趁後生滾大筆錢。一個人二十歲開始每月儲二千蚊，將錢滾存，可能最終得到嘅本金會比三十歲開始每月儲三千蚊多，年輕人應該把握時間優勢同複息增長嘅力量，唔好拖住儲錢。
彩兒：我都想儲蓄，不過唔知點解每個月總係使到冇得剩，一定係我人工太低。
卓：其實每個階層都有月光族呢個情況，醫生、律師都會使晒啲錢，我諗未必關收入事。唔理份糧有幾多，要使就一定會使得晒，儲錢未必係話要儲幾多，係睇你有冇實行去儲。首先要有「先儲蓄，後消費」嘅概念，呢個要建基於你嘅人生目標，即使係年輕人，未來都要買樓、結婚、生仔、退休，有咗明確目標，就去實行「先儲蓄，後消費」。
實行嘅其中一個方法係控制支出，你可以將每個月嘅開支用Excel或者手機Apps記錄，幫你睇下數目有幾多，做一個收支嘅平衡表，你自然會發覺有啲支出其實唔係咁重要，可以省卻。好似有啲人會習慣每日飲杯咖啡，或者食煙，一杯咖啡要三十幾蚊，食包煙又要五、六十蚊，一日飲杯咖啡、食包煙，已經要用一百蚊，省卻咗佢，一個月就可以慳返三千蚊。又或者每個月去少一次Fine-dining，已經可以慳一、二千蚊，你整體嘅生活質素又唔會因為咁而降低。儲錢概念係放棄今日嘅購買力，換取日後更大嘅購買力。
Kitty：你早就進身中產階層，但聽講依家養一個小朋友要400萬，你仲有兩名千金，會唔會都有成為月光族嘅危機呢？
卓：我有兩個小朋友，佢哋嘅幼稚園學費加埋都要萬幾蚊，又要供樓，父母亦準備退休，每個月支出都好大，但我都儲到兩至三成人工。中產人士喺生活質素同儲錢之間要攞個平衡，試吓諗遠少少，中產人士做嘢咁辛苦都係為家人同自己退休有較好嘅生活，所以應該放棄目前一啲使費。我嘅目標係45歲前退休，享受人生，我計過要有二千萬資產先可以有財務自由，所以我每個月會預留部分收入以達成呢個目標。
彩兒：咁係唔係可以透過投資加快儲蓄目標？
卓：投資要一步一步去做，應由低風險做到高風險。依家通脹頗高，年輕人第一步就係要抗到通脹，有多餘錢可以買iBond，或者買啲定息嘅儲蓄計劃，之後可以做吓基金、債券同股票投資。好多人誤會本金小就要做高風險投資，但其實博博吓可能連個本都冇埋，儲大咗個本金先可以做到資產分配，有個穩定嘅投資組合，賺錢機會先會大。我自己就買一啲退休同子女教育基金，每年回報約有4至5厘。
葉：宏利人壽保險分組經理 葉嘉輝(Kanu)
彩兒：Kanu，聽講你都經歷過做月光族嘅日子，因乜事你都會同我哋一樣？
葉：嗰時入咗經紀行業半年，咁啱遇上08金融海嘯，收入得返七、八千蚊，我又冇降低使費，平日都係照出街食飯，交通同家用又冇得慳，所以咪個個月儲唔到錢囉。
Kitty：大約年半後你就成功擺脫月光族，唔通係因為你睇少場戲、去少啲日本？
葉：嗰時我去咗馬會做兼職增加收入，每月多賺二、三千蚊，少啲出街睇戲，減少食貴野，旅行都係揀去東南亞，之後人工又慢慢升返。其實份工好緊要，工作上要有突破同睇到有前景，適當時候要轉工或者進修。另一方面，一定要做少少投資，每月可以攞人工最少一至兩成買吓股票或者基金，風險承受能力較低嘅人，可以買入有保證回報嘅儲蓄計劃，不過投資年期就要較長。
彩兒：你上個月啱啱結咗婚，開支會唔會大咗好多？
葉：通常30歲左右、結婚生咗小朋友嘅人好多都會變月光族，因為會搬咗出嚟住，住屋開支分分鐘佔一半人工，我仲未有小朋友，所以只係多咗租金同水電煤嘅開支，之前婚禮同裝修用咗大約五十萬，都係一次過開支，目前還可以。我依家每月個人使費佔人工大約三分之一，租金同家用分別都係佔一成幾，餘下嘅會儲起。
Kitty：港女唔係鍾意有樓嘅男人咩，你又唔買樓結婚嘅？
葉：好彩我嘅伴侶唔覺得一定要有自置物業，我唔係好心急置業，希望等樓價回落到合理水平先入市，樓價未來應該會跌兩成，依家租樓唔係差嘅選擇。我依家租住緊荃灣區嘅村屋單位，交通唔方便，但租金少於一萬蚊，相比起供樓輕鬆得多。不過，樓最終都係必需要買，供樓係可以幫到你儲錢，老咗又可以做逆按揭，攞返啲現金出嚟。
彩兒：睇嚟我真係要盡快開始儲蓄，兼搵返個結婚對象喇。
孖妹積極慳錢之餘，亦想買吓股票做中、長線投資，幫資本增值，唔知又可以點揀呢？
新鴻基金融財富管理策略師溫傑建議，用「由上而下」嘅選股方法，從前景看俏嘅行業中發掘優質公司，估值有折讓就更好。
投資期為兩年嘅話，他建議揀波動較低嘅股份，當中較睇好恒生銀行（00011）同長和(00001)。他話，兩隻股份過去1年嘅啤打系數(BETA)喺恒指成分股中處較低水平，同大市相關度較低。他話，恒生今年底預測市帳率(P/B)只有約1.89倍，相對低嘅估值有望支持佢嘅股價表現；長和全球業務多元化，有助分散地區風險。
至於要買入股票作10年期投資，他就較睇好港交所(00388)，因而滬港通、深港通、倫港通等措施有望提升港股成交，有利港交所。
他又話，冇時間做研究嘅話，可以買入唔同國家地區嘅ETF(交易所買賣基金)或者基金，好似盈富基金(02800)，追求同大市同步嘅回報。
─ ─ ─ ─ ─ ─ ─ ─ ─ ─
「東網Money18」fb專頁：有討論、有分析，齊來FUN享，贏盡●你Like http://www.facebook.com/money18
|
鍾意就快D Share啦！
|
|
|