現年24歲嘅何家「最索千金」何超蓮（Laurinda），同跟35歲台灣歌手吳克羣拍拖近4年，由本來低調處理感情事，到之後半公開戀情，早喺今年6月先被本報爆超蓮同吳克羣去英國甜蜜拍拖，睇落佢哋感情幾穩定，吳克羣亦早已融入賭王家中，三太陳婉珍同家姐何超雲都著過吳克羣經營嘅品牌以表支持!
點知近日何超蓮疑同男友去日本北海道玩，似乎發生咗啲唔愉快嘅事，超蓮今早5點幾左右，疑喺Instagram貼相表示二人已分手，留言：「我答應自己，這是我最後一次為你流淚，我不會記恨，我要往前走，不會再執著一切真真假假，最重要的是我會永遠記住分開的那一刻你給我留下的最後印象，可以讓我提醒自己不能再這麼傻，也許有一天我會謝謝你，謝謝你讓我學會怎麼樣更愛自己多一些!」
本報查過超蓮嘅Instagram，發現超蓮貼出喺日本北海道地獄谷鐵泉池嘅相，相中所見，超蓮只係晒背影，未知呢張相係唔係吳克羣為佢「操刀」，而吳克羣就喺facebook貼出身在北海道熊牧場嘅相，明顯佢哋二人疑一齊去旅行，點估到最後鬧分手!
據知超蓮所講嘅唔執著「一切真真假假」，係因為吳克羣疑有第三者，今日《蘋果》問過超蓮好友李蘊知唔知分手一事?佢講：「我啱啱睇咗佢ig，同佢傾咗幾句，佢大把市場，驚乜！超蓮係好堅強嘅女仔，我哋唔會擔心佢，一定有好好嘅另一半出現。」
問到吳克羣係唔係唔好？李蘊表示：「見過佢幾次都ok，佢可能表面功夫做得好好，但人係會變，女方受傷害，但唔係身體傷害！超蓮好投入呢段感情，好乖，做足女友本份，盡晒女友責任。」吳克羣係咪有第三者？李蘊又稱：「問番個男仔。」
講及超蓮有冇喊？佢話：「佢係冷靜派嘅人，睇佢ig都知佢唔開心，但唔係會發癲嘅女仔。」
另外，吳克羣噚日喺台灣出席第8次街唱，仲同現場嘅支持者影合照，但明顯一臉倦容。
|
鍾意就快D Share啦！
|
|
|
