TVB撩挑機乜都剪 Youtuber嗌罷睇
收視每況愈下的無綫，近日欲借助新媒體力谷收視，邀請司徒夾帶等網絡紅人拍攝真人騷《網絡挑機》，讓一班Youtuber惡搞插爆無綫節目。然而，節目昨晚出街前夕，有份拍攝的Youtuber伍公子卻於網上狂插無綫禁鬧汪明荃唱歌難聽及限制多多「乜都剪走晒」，呼籲大家罷睇，擺明倒米，氣得節目編導岑應爆粗回應，火藥味濃。不過，有網民寸Youtuber又要威又要戴頭盔，質疑他們跟無綫夾計宣傳谷收視。
無綫編導岑應繼《盛女愛作戰》及《沒女大翻身》後，近日邀請近20位網絡紅人拍攝新一輯真人騷《網絡挑機》，包括司徒夾帶、JFung、伍公子、大埔Lulu和Eminleo等，聲稱讓一班Youtuber進行各式各樣惡搞二次創作，任由大家插爆無綫劇集和綜藝節目等，欲借助新媒體力谷傳統媒體收視，節目還請來劉以達扮方丈自抽。
■Youtuber伍公子（右）和司徒夾帶昨日受訪時表示阻不了人看無綫，大家對該台有很深厚感情。攝影：林德雄
懷疑夾宣傳
不過，節目昨晚首播前夕，有份演出的Youtuber伍公子於昨日凌晨在facebook狂插遭無綫河蟹，呼籲大家熄機勿捧場。伍公子留言謂：「記得一開波，我就問監製：『你個節目到底想點？』監製話：『我要個節目爆。』到開鏡時，我XX阿姐唱歌好X難聽，後來聽講啲focus group睇到都話大快人心，不過TVB就話我太X街，成段剪走晒。結論係，X街又嫌太X街，X又嫌太X，乜都剪走晒，我真係唔知個節目點爆，可能《愛．回家》仲好睇。」氣得編導岑應在fb爆粗還拖說：「唔玩得就咪X學人嚟玩。」火藥味十足。但有網民就認為一班Youtuber過往經常寸爆無綫，為對方拍攝節目實在不智，如今又呼籲罷睇，實在「又要威又要戴頭盔」，甚至質疑Youtuber與無綫夾計力谷收視。
■岑應爆粗回應直斥伍公子「既然唔玩得，便不該上節目」。資料圖片
■安德尊與眾Youtuber拍攝《網絡挑機》，跟傳不和的李錦聯比拼打遊戲機。
記者昨日致電伍公子，他認為鬧爆片段被刪剪是不尊重觀眾：「講咗又嚟自我審查刪剪，我相信唔係岑應個人發生嘅事，TVB內部成日都『河蟹』，好僵化同有漏弊，TVB本身有問題。」對於網友質疑做宣傳，伍公子說：「一定會有人咁覺得，冇辦法，唔理得咁多。」另一Youtuber司徒夾帶在電話中力撐伍公子罷睇，並謂：「佢係講事實，叫人唔睇係一個抗議方式，邊個鍾意拍嘢俾人剪，佢哋話明唔畀鬧汪阿姐（汪明荃），我條片就唔准用王維基。」他又指無綫禁寸《勁歌》頒獎禮。
■劉以達在節目中扮方丈，據悉他一集酬金高達三萬。電視圖片
■（左起）Eminleo、大埔Lulu和伍公子在節目中寸爆無綫拍膠劇。
■司徒夾帶昨力撐伍公子，更爆無綫禁他用王維基。
貼錢整後期
Eminleo昨也在fb和應：「有人問我拍TVB為乜，我答梗係為錢我哋收咗大嗱嗱36,000蚊，拍咗兩條成本起碼要10萬蚊嘅片。我自己都貼咗幾千蚊畀人整後期，連車馬費都冇得賺！」
司徒夾帶昨與伍公子在土瓜灣接受訪問，對於呼籲觀眾罷睇，司徒夾帶自問難有此影響力說：「TVB點解唔死，係因為香港觀眾依然好愛TVB。民建聯啲票根本同TVB收視一樣，都唔明係點嚟。」他其後受訪時更直認拍該節目是博出位。
採訪：陳杰
■伍公子昨在facebook插爆無綫「乜都剪走晒」。
■（左起）Eminleo早前與薑檸樂和伍公子開心宣傳節目，如今卻反目收場。
|
鍾意就快D Share啦！
|
|
|
