聖誕開 party 即影即印炒熱氣氛 [壹週刊 - 1345 - 生活] __,M1,

壹科林聖誕開party　即影即印炒熱氣氛就快到聖誕，當然要準備搞party、開大食會，約埋班朋友玩番餐，不過除了要預早準備場地之外，可以炒熱現場氣氛的電子產品絕對不能少，其中即影即有相機更加是首選。雖然即影即有相機並不算新科技，但往往最能夠令班朋友聚埋一齊大影特影，甚至部分新推出的數碼即影即有相機，可即時上載到社交網站同朋友分享，隨時可以吸引更多朋友撐場。室內出色　PolaroidSnap講到即影 ...

壹科林

聖誕開 party　即影即印炒熱氣氛

就快到聖誕，當然要準備搞 party、開大食會，約埋班朋友玩番餐，不過除了要預早準備場地之外，可以炒熱現場氣氛的電子產品絕對不能少，其中即影即有相機更加是首選。

雖然即影即有相機並不算新科技，但往往最能夠令班朋友聚埋一齊大影特影，甚至部分新推出的數碼即影即有相機，可即時上載到社交網站同朋友分享，隨時可以吸引更多朋友撐場。

室內出色　 Polaroid Snap

講到即影即有相機，點可以不提 Polaroid，而 Polaroid Snap就是其中一部數碼即影即有相機。可拍攝 1000萬像素相片之餘，亦有 F2.8光圈，就算室內影相都夠光。影完相可以直接打印成 2吋× 3吋相片，打印方式採用 ZINK熱感打印技術，打印一張相片只需一分鐘。

售價：$1,090

網址：http://www.polaroid.com

機頂的彈開式觀景器，打開後就自動着機，毋須四圍搵掣。

外形夠吸引　 Polaroid Socialmatic

如果覺得 Polaroid Snap的外形不夠突出，其實仲有一部 Polaroid Socialmatic可以揀，最大特點是相機外形跟足社交平台 Instagram的 app logo設計，拍攝像素達到 1400萬，機背更特別加入 200萬像素自拍鏡頭。另外，內置 LED補光燈，昏暗環境下拍攝都絕無問題。加上內置 Wi-Fi，可即時上載相片到社交網站。

售價：$2,790

採用 Android操作系統，要擺相上社交網站，勁方便。

回歸傳統　 Fujifilm instax mini 90 neo classic

除了數碼即影即有相機， Fujifilm是現時極少數仍維持生產傳統即影即有相機的生產商，其中 instax mini 90 neo classic就好適合開 party用，除了因為外形似十足同品牌的懷舊數碼相機之外，最重要是功能絕不弱，除了有雙重曝光、 10秒快門及微距等功能之外，亦設有閃光燈，實用性較高。

售價：$1,580

網址：http://www.fujifilm.com.hk

機背設有顯示窗，可顯示拍攝模式及剩餘底片張數。

流動印相機

雖然即影即有相機都幾好玩，不過用到機會不算太多，想更加實用，其實可以考慮手機專用的流動打印機，朋友用手機影完，即可連接打印，即場派相人人開心。

印相一分鐘　 LG PD251

重量只有 183g，體積亦夠細，放落褸袋神不知鬼不覺。利用藍牙連接手機傳送相片，主流手機平台都支援。採用 ZINK熱感打印技術，不怕印到中途不夠墨水，最正是一分鐘就印到 2吋 x 3吋相片，不怕有冷場。

售價：$990

網址：http://www.lg.com/hk

專用的印相 app有好多自選相框，玩味更濃。

玩埋錄音　 Polaroid Zip

無論重量及體積都和 LG PD251差不多，但加入錄音功能，可在相片留言。玩法是先在相片錄低留言或使用專用 app加上文字，之後印相時就會加上 QR code，對方收到相後，可再用專用 app一掃 QR code，就能夠上網聽番留言及睇到文字。想即時同女神交換電話又不想俾人知，啱晒。

售價：$1,190

最長可錄製長十秒的錄音，足夠講電話號碼同 facebook資料，以便女神搵你。

何謂熱感打印？

其實原理上同以往的 fax熱感紙差不多，但由於能打印出顏色效果，所以在數碼列印上廣泛使用。熱感打印的好處除了毋須用墨、換墨之外，更重要是相紙不會「走光」，就算相紙拆開擺放一段時間都一樣用得。不過，由於現時熱感打印技術仍在發展階段，所以打印效果比較粗糙，亦會有偏色問題，變成數碼即影即有相特色之一。現時 2吋 x 3吋 ZINK相紙，售價約$125，一盒有三十張，同傳統即影即有相紙差不多。

熱感打印毋須用墨，能令機身更細外，換相紙時亦不受環境光暗影響。

雖然 ZINK相紙同傳統即影即有相紙售價差不多，但 ZINK相紙較軟身。

撰文：蘆甘

攝影：張國慶

features@extdigital.com.hk

來源 source: http://hk.next.nextmedia.com

鍾意就快D Share啦！

下一篇 》