經過那些年……高登巴打日前發起力推汪明荃奪視后、歌后攻略，想助汪明荃憑《華麗轉身》喺《萬千星輝頒獎典禮2015》同《2015年度勁歌金曲頒獎典禮》橫掃獎項，唔少網民跪求大家支持汪阿姐，可惜最終辦事不力，未能谷汪阿姐封后，難怪原本係賽前大熱嘅阿姐，見一眾後輩有獎拎，似乎有啲失望兼嬲嬲豬!
噚晚萬千星輝頒獎典禮2015中，吳若希拎咗「最受歡迎劇集歌曲」，而演《鬼同你OT》嘅胡定欣就當上視后，結果汪阿姐只憑《Sunday靚聲王》拎「最佳節目主持」。
羅家英今日凌晨喺微博留言：「汪小姐不要介意，胡定欣演得很好，公司要給年輕人機會，也很合理，何況多個獎對你沒甚麼大不了，應該向公司表明、以後不再參與比賽，與年輕人爭一日之長短了。何況梁系已飄蓬葉落，你明白的。」之但係，有網民寫道：「羅先生這樣講好容易令人誤會！最在意的是我們這班fans！少少失落應該是有，但我偶像才不會介懷拿不拿得到獎。最沒必要的是把胡小姐和梁先生都拉埋一起講。這樣的言論只會令我偶像尷尬！」
據知，胡定欣喺大台多年演出多年，甚少做主角，胡定欣演重頭劇《名門暗戰》只係做配角，而演《鬼同你OT》論戲份，田蕊妮又似乎多戲過定欣，難怪汪阿姐輸視后俾胡定欣會嬲嘅，不過，汪阿姐在場，亦大方恭喜得獎者，甚有大將之風。
另外，羅家英暗示嘅「梁系」—似乎係講緊前無綫電視製作部戲劇製作總監梁家樹，暗指汪明荃係「梁系」。正所謂「一朝天子，一朝臣」，早前已盛傳大台「黨派之爭」，無綫電視製作部非戲劇製作總監余詠珊掌握大權，與樂易玲及曾勵珍互相制衡，尤其「余黨」洪永城、黃翠如等有線舊將喺無綫公仔箱演出機會最多，邊個權力高，仲問!?
|
鍾意就快D Share啦！
|
|
|
