藝人李家鼎與前妻施明的大仔李泳漢今日小登科，迎娶拍拖兩年嘅圈外女友Conny，今日一早細佬李泳豪喺微博貼上哥哥去九龍城接新娘嘅相片。35歲嘅李泳漢笑晒口，穿上傳統中式禮服，胸口戴上彩球，十分醒神，兩兄弟搭晒膊頭，西裝骨骨嘅泳豪留言﹕「阿哥準備接新娘。」日前泳豪陪阿哥試禮服時，仲叮囑哥哥﹕「你要乖」認真鬼馬。而新老爺李家鼎回覆《蘋果》時，對於大仔小登科，感到相當興奮：「多謝多謝！（做新老爺心情點？）Happy Happy。（有咩寄語一對新人？）暫時諗唔到。（開枝散業？）係啦，哈哈哈。」問佢送咗乜嘢畀新抱？李家鼎表示：「例（牌）啦，一對龍鳳鈪。（囝囝接新娘畀人玩肉唔肉痛？）呢啲預咗啦，冇肉痛，男人係被虐者。」另外，李泳豪亦向哥哥送上祝福，佢話：「百年好合，永結同心﹗自己就加油啦﹗（係咪就做阿叔？）哈哈，呢啲留畀佢哋自己講啦﹗」
來源 source: http://hk.apple.nextmedia.com
|
鍾意就快D Share啦！
|
|
|
