【《蘋果》溫哥華直擊】講誓詞變喊包 鍾嘉欣：想生4個
【嘉欣結婚了】
恭喜恭喜！鍾嘉欣和脊骨治療師Jeremy於香港時間昨日在溫哥華補擺喜酒，在約80名親友見證下宣讀誓詞。靚靚人妻嘉欣先後穿上裙褂及高雅婚紗，真情剖白與老公相識僅四天已認定對方是Mr. Right，要嫁給對方，並揚言想生四個小朋友。
現年31歲的鍾嘉欣去年底秘嫁約44歲、無綫集團前主席梁乃鵬的醫生姪仔Jeremy Leung，《蘋果》派出採訪隊飛抵溫哥華全程直擊嘉欣和Jeremy的婚禮過程。一對新人僅邀約80位至親好友參加，據悉現場不停播放嘉欣為Jeremy親自作曲及主唱的《我結婚了》，宣讀誓詞一刻嘉欣最先忍不住喊，老公和台下幾位姊妹都被感動落淚，場面感人。
■31歲的嘉欣昨日與約44歲、職業為醫生的Jeremy在溫哥華宣誓及擺婚宴。記者黃曉程溫哥華傳真
「心跳可能200下」
於香港時間昨日凌晨5時40分，即溫哥華前日下午1時40分，陽光普照下新娘子由七名姊妹陪同步出豪宅前往The Arbutus Club的婚宴場地。疑懷有三個月身孕的嘉欣穿上一件寬身中式裙褂及矮踭繡花鞋，Jeremy一度眉頭緊皺，之後兩人手拖手小心翼翼地拾級而下，嘉欣說：「我約你哋三點鐘訪問，我驚嚇親我老公呀！」
Jeremy先落車拖實老婆入會場，嘉欣在場內換上一襲高雅密實婚紗，高腰款仍隱約見到圓潤腰肢。宣讀誓詞一刻，嘉欣最先忍不住喊，之後二人見傳媒時Jeremy被要求錫嘉欣，他怕醜只敢錫頸，十分搞笑。嘉欣父母大讚女婿值100分，嘉欣媽媽說：「滿意滿意，100分！」嘉欣爸爸笑言不止100分。其後嘉欣單獨受訪：「好開心，最親嘅人，最好朋友都喺度。上次12月結婚時好簡單，對我嚟講已經好足夠，但奶奶同老公想畀個dream wedding我。」被傳媒爆出婚訊，確令二人有點手足無措：「老公唔鍾意影相、唔鍾意應酬、唔鍾意嘈，頭先見到咁多記者都係扮鎮定，佢個心跳可能跳到200下，成個禮拜冇一日瞓到覺。」
嘉欣戴着一隻重一卡多鑽石的結婚戒指，笑言是「最靚嗰隻」，透露老公在一個很多燈飾的浪漫地方求婚，她說：「我哋識咗十個幾月，好得意，原來呢個世界真係有meant to be（注定），因為我認識佢唔使第四日，唔知點解，心裏面覺得佢係我老公，佢亦認定我係老婆。」她繼續滔滔不絕讚老公：「我真係好愛佢，佢真係好錫我，佢平時影selfie都唔肯，佢心地好善良、成熟又勇敢，好鍾意小朋友，仲好孝順爸爸媽媽，佢係我嘅Mr. Right。」
■嘉欣換上高雅婚紗，雖然拎着花球，但高腰款仍隱約見到腰肢圓潤。讀者提供圖片
■Jeremy好怕醜，徇眾要求下只敢錫老婆的頸項，不敢嘴對嘴。
拎油畫婚照遮面
有傳嘉欣有喜，她默認好消息：「BB嘅嘢，唔好亂講，我覺得太早，適當嘅時候公佈。」記者追問是否雙喜臨門？她說：「BB嘢就唔好講啦，有乜事就唔好啦。」問想生幾多個？她說：「想生四個。」在場記者都「嘩」一聲，嘉欣笑言：「好得人驚呢，唔係我講嘅，我老公講，我會配合嘅。」為維繫異地婚姻，她透露已向無綫請假至7月尾，問會否退出娛樂圈？她說﹕「唔會，我仲有好多嘢未完成。但婚後唔會去度蜜月。」
婚宴至凌晨1時許，一對新人步出，Jeremy拿着包好的婚照油畫，一時用畫遮自己塊面，相當怕醜。婚宴是否好開心？嘉欣說：「好開心，好感動。」到4時仍未睡的嘉欣，更新微博答謝傳媒。
採訪、攝影：黃曉程、梁繼光
■Jeremy的父母昨早盛裝出席兒子的婚宴，更大派利是。
■嘉欣父母大讚Jeremy是一百分好女婿。
|
鍾意就快D Share啦！
|
|
|
