| （互聯網圖片） | next 1/1 pre |
世盃外亞洲區第2圈煞科日，喺C組非勝不可嘅中國，主場對住肯定首名出線兼有3名主力停賽嘅卡塔爾，幾經辛苦下憑中場黃博文及武磊各入1粒贏2比0，加上約旦同北韓失分，令國足奇迹地殺入第3圈12強賽！
根據賽制，世盃外亞洲區第2圈除每組首名可進身12強賽外，8組中4支最佳第2名亦可出線，賽前中國於「次名排行榜」只列第6，想爭取前4唔單止一定要贏波，仲要望其他組次席如阿聯酋、約旦、北韓或伊拉克，至少2隊喺今輪失分，先有一線生機。因此國足今仗精銳盡出，除咗隊長「張莫斯」張琳芃傷愈復出，以武磊為首嘅鋒線「假9」，配合張稀哲、黃博文、蒿俊閔，以及上仗贏馬爾代夫4比0「戴帽」嘅姜寧後上支援，面對篤定首名出線、有3名主力坐波監嘅卡塔爾，一開波即藉地利撳住搶攻。21分鐘武磊殺入禁區被對方推跌，但29歲馬來西亞球證伊斯雲視若無睹，24分鐘張稀哲快開罰球，武磊心口一控起右腳窩利抽射，可惜省到對方後衞僅僅出界，錯失良機。
易邊後中國繼續施壓，蒿俊閔遠射高出。臨危受命嘅主帥高洪波決定「撳掣」，53分鐘換入高大中鋒于大寶加強攻力，即立竿見影，57分鐘武磊於左路落底線，張稀哲近門快射被擋出，于大寶立刻執雞竟中楣，好彩黃博文及時再補中成1比0，之後武磊錦上添花，中國贏2:0全取3分。適逢H組嘅北韓以2比3輸畀菲律賓，B組約旦亦慘敗畀澳洲1比5，令國足肯定成為8組中4支最佳第2名之一，奇迹躋身第3圈12強賽。
來源 source: http://hk.on.cc
|
鍾意就快D Share啦！
|
|
|
