楊怡名正言順風騷晒巨鑽
在英國秘婚的羅仲謙與楊怡，昨日以羅生羅太姿態返港談新婚喜悅。自言以往與羅仲謙拍拖要偷偷摸摸的楊怡，風騷大晒閃爆訂婚鑽戒笑言終可名正言順。而全程叫「太太」的謙謙，事後更在網上肉麻示愛：「羅楊怡，謝謝你的愛！」
羅仲謙情深錫額，楊怡冧笑不停，手上閃鑽亦相當搶眼。
羅仲謙與楊怡由出閘到受訪再護妻上車，甜蜜互動，閃爆機場。
現年36歲的楊怡與31歲的羅仲謙被揭本月22日在英國古堡秘婚，攜手踏入人生另一階段。新婚的兩人昨午約3時半返抵香港，在機場現身時吸引近百傳媒採訪，剛榮升「羅太」的楊怡翹實老公雙雙步出禁區，略見疲憊的謙謙戴上黑框眼鏡，未見手上的婚戒，戴墨鏡的楊怡則「人逢喜事精神爽」頻頻揮手示好，不經意晒出左手的巨型鑽戒。
想太太似公主出嫁
兩人受訪時，不時深情對望兼甜笑，謙謙全程以「我太太」稱呼楊怡，認真冧爆！兩人首度開腔承認在英國拍攝婚照及註冊，並透露將安排婚宴：「嚟緊會喺香港籌備，會擺酒同大家分享。（幾時？）未定。（返圍村擺？）唔會。」問到今次到當地秘婚是否籌備已久，謙謙即席Sweet爆地說：「今次想大家家人見面，畀我太太一個甜蜜回憶。點解揀英國？我鍾意古典氣氛重，同埋希望太太好似公主咁出嫁。」
提到遭踢爆婚事，楊怡說：「結婚係開心事，唔好講踢爆，都打算畀大家知，返嚟諗住講，估唔到大家早咗知道，比我哋預料嘅早啲。」而早前有指楊怡為結婚生B而不續約無綫，她即避談並轉話題：「仲傾緊。（續約成數大？）我好肯定今年會擺酒。」當問是否大肚才急於結婚，楊怡否認：「唔係啩，咁爆？我今日條腰得22吋。」謙謙更「婦唱夫隨」指不心急生B：「太太都唔急，我急咩？」但楊怡似乎未習慣「羅太」的稱呼：「唔慣呀，大家唔好咁嗌我！」
由於兩人英國行相當神秘，似有隱瞞公司秘婚之嫌，楊怡即指公司一直支持兩人交往，謙謙亦說：「年頭已經同老闆講會結婚，結婚係開心事，收到好多短訊祝福，我哋都唔敢回覆住，想返嚟一次過講，唔想大家有猜測，大家都知做呢行，消息未必真確，想返嚟喺鏡頭前多謝佢哋。我哋相處好幾年，結婚係大家意料中事，都想能夠快啲拉埋天窗。」提到新婚不久便要分開工作，楊怡揚言若有時間會探老公班，有別以往偷偷摸摸拍拖：「可以名正言順去探佢。（依家一齊住？）係呀，大家唔使跟我喇！」
「謝謝你從此牽着我走」
傳媒要求一對新人錫錫，惟謙謙「三催四請」下才肯親吻楊怡額頭，之後識做地拖實楊怡，全程護妻離開機場，雙雙返抵楊怡位於將軍澳的愛巢。楊怡晚上在微博貼出婚照，相中兩人在夕陽下拍攝唯美照片，正如謙謙所言，為令楊怡如公主般出嫁，相中可見他安排了一架馬車在婚禮中出現，認真有心思！楊怡亦冧爆留言：「將踏入人生另一階段，謝謝你從此牽着我走，感謝大家對我們的祝福。」謙謙亦轉發留言，趁機肉麻示愛：「羅楊怡，謝謝你的愛！」
採：影視組
文：專案組
羅仲謙情深錫額，楊怡冧笑不停，手上閃鑽亦相當搶眼。
羅仲謙與楊怡由出閘到受訪再護妻上車，甜蜜互動，閃爆機場。
|
鍾意就快D Share啦！
|
|
|
