掃呢頁CODE去手機

2016年3月23日 星期三

盛品儒激嬲老竇險逐出家門 __,盛品儒,

盛品儒激嬲老竇險逐出家門前亞視高層盛品儒鬧出小三Tasha風波後,與太太蔡一鳳首次出席公開活動,雨過天青的兩人受訪時不時甜笑攬腰及錫錫大晒恩愛。盛品儒高度讚揚老婆處理手法100分,更表示以後會以連體嬰姿態出街,雖然獲得老婆原諒,卻自爆爸爸差點嬲到將他逐出家門!但被問到Tasha聲稱墮胎一事,他強調冇可能發生,但避談有否發生性關係。盛品儒全程又攬又錫蔡一鳳。前亞視高層盛品儒(James)早前爆出小三 ...


前亞視高層盛品儒鬧出小三Tasha風波後,與太太蔡一鳳首次出席公開活動,雨過天青的兩人受訪時不時甜笑攬腰及錫錫大晒恩愛。盛品儒高度讚揚老婆處理手法100分,更表示以後會以連體嬰姿態出街,雖然獲得老婆原諒,卻自爆爸爸差點嬲到將他逐出家門!但被問到Tasha聲稱墮胎一事,他強調冇可能發生,但避談有否發生性關係。

盛品儒全程又攬又錫蔡一鳳。

前亞視高層盛品儒(James)早前爆出小三風波,小三Tasha在討論區自揭並聲稱曾為對方墮胎。事後自嘲「跪咗成晚玻璃」的James表示,已獲太太蔡一鳳(Michelle)原諒兼出面力撐,早前蔡一鳳更以千字文剖白事件來龍去脈,二人心情未有受到影響,更齊齊到泰國旅行。他倆昨日於珠寶店受訪,全程又攬又錫,十分恩愛,期間蔡一鳳不斷代夫搶答問題。

不過,James坦言父母對此事十分憤怒,更揚言要將他逐出家門。身為獨生子的他,若父母狠下心腸的話,盛家家族生意將無法繼承,他亦勢必一無所有!

以後出街連體嬰

記:記者

盛:盛品儒

蔡:蔡一鳳

記:你哋係咪已經雨過天青啦?

盛:係,不過遍體鱗傷,個膝頭損晒跪玻璃,隻手就有牙印,得番外表,入面就爛晒。

記:對Michelle有冇承諾以後唔亂嚟?

盛:我諗唔使咩承諾,大家跟住大家之後,連體嬰出街,唔敢自己走開。

記:(問蔡一鳳)會唔會唔畀佢(盛品儒)上網?

盛:(搶答)呢個冇可能,呢個難啲,好似屋企人管細路咁樣,會畀晒網上戶口密碼,其實我啲女仔朋友佢都識。

記:咁個女仔仲有冇煩你哋?

盛:冇啦冇佢都覺得玩大咗。

蔡:佢自己都應該知道錯,都要收手,當佢係未夠成熟嘅小朋友,玩大咗,我哋唔會同佢計較。

記:會唔會影響你哋夫妻之間留下傷痕?

盛:咁任何夫妻之道都有嗌交嘅傷痕,大家體諒,今次件事,都未必係件唔好嘅事,大家諗點撐大家,點幫到大家,回想起嚟傷痕係大,但唔係百分百唔好嘅事,經一事長一智。

記:Michelle你有冇為呢件事喊過?

蔡:咁梗係有冇喊先奇怪,以前大家做嘢真係好忙,各有各飛,傾偈時間都冇,行街已經都少,試過一月份時我哋成個月先見到半個鐘,真係唔啱要檢討。(減少工作?)真係要,老公嚴重投訴。

冇可能有BB

記:之前Tasha講到自己有咗又落咗,令你哋好震驚定真係有咁嘅事?

盛:呢個消息好震驚,我之前講咗,冇嘢再回應,佢殺人佢嘅事,講絕啲都要講。(可能係殺咗你嘅BB?)我覺得呢個可能性唔大。

記:冇可能係因為你哋冇發生性行為?

盛:冇可能啦,總之。

蔡:其實呢單嘢話有咗,我覺得唔係真,冇可能嘅,我雖然唔知佢兩個啲嘢,我唔想問,唔想知,諗住原諒佢我就唔會去問其他嘢,亦唔想逼老公講大話。我了解我老公,呢方面好難,我哋都好努力想生B,如果佢真係有咗,佢一早應該攞出嚟講,六月份時個女仔有嚟Like過我Facebook,我都有諗住開導佢,同佢做朋友,約出嚟飲嘢,但太忙最後冇見到佢。如果真係咁,咁佢有咗應該一早同我講,佢有晒我聯絡電話,老公唔再同佢見面,佢跳出嚟講呢啲嘢,試諗吓如果一個女仔有咗,一早應該出嚟嘈,用吓自己腦,根本就冇可能。

希望對方出來澄清

盛:你生咗出嚟就話可以威脅到,死咗點威脅人。

蔡:我好明白鍾意一個人嗰時,見唔到面嘅心情,用好多方法去做好多嘢,唔想話到佢好有機心,我唔識佢,所以唔評論佢,但我都希望佢出嚟澄清吓,自己做過啲乜嘢減低對我哋嘅傷害,佢應該出嚟講清楚。

記:咁件事係點解決咗?Tasha使唔使賠償?

盛:唔需要,有乜好賠,冇發生嘅事。(你哋講有名人都中咗招?)有朋友同我講,話有人遇到同類事,叫我小心啲。

蔡:(搶答)個朋友問有冇咩需要幫手,但覺得無謂拖累人哋,又唔係光彩嘅事,我哋明白亦唔好意思叫人出嚟幫我哋澄清,想件事完咗佢。

心入面唔舒服

記:對老婆處理手法係咪好欣賞?

盛:非常好,100分,好果斷,好感動,好厲害。(有冇話再有下次會點?)冇冇下次。

蔡:個心入面點都會唔舒服,如果真係要離婚佢一早就會自己講,我未知件事時佢已Block晒佢所有嘢,呢個行動,係我首要原諒佢嘅原因,但個女仔不停做唔同嘅嘢,我老公真係冇理佢,佢唔放棄,之後仲講到有咗,我點解相信老公,因為如果佢真係有做咁嘅事,件事搞到咁大,我都會驚,我都唔想出面嘅人知道,但如果冇做過,就唔使驚,唔好理佢。

盛:依家嘅女仔真係癲癲哋,比較勇猛,但佢仲有咩講,你都癲到講自已殺咗個BB。(屋企人有冇好嬲?)有,梗係唔開心,佢哋已冇乜同我講嘢,嬲咗我,爹哋話就快逐我出家門,話你祖先咁叻,你搞埋嘅咁嘅新聞出嚟,佢哋比較傳統,咁我一定會錯。

蔡:你都有錯,要道歉,但個女仔選擇同傳媒爆料而唔搵我講,佢嘅目的好清楚,我分析過佢想紅、想見報、想出位、想我哋離婚。

訪問後兩人猶如連體嬰般孖住合照,又攬又錫,蔡一鳳更面露甜笑。

採:名人組

文:專案組

盛品儒全程又攬又錫蔡一鳳。


來源 source: http://the-sun.on.cc
鍾意就快D Share啦!