全知言
天降橫財中頭獎 啲錢點使好？
六合彩個個想中，買完幻想下啲錢點使都夠大家 high一日，原來班明星都愛發下橫財夢，做人父母嘅郭羡妮、郭政鴻第一時間幫仔女儲做學業基金。想擺脫貧窮無間地獄？早啲瞓
郭羡妮：儲基金
我一定會留筆錢俾我個女儲做基金，同埋買一層好舒服嘅樓俾屋企人。我唔會退休嘅，因為太早喇，好大嘅橫財自己冇試過，抽獎中就試過，但唔係一個好大嘅獎，仲要唔係 Cash而係禮物啫。
蘇麗珊：開 café
首先我唔會俾人知先，因為好危險，我知中橫財好易行衰運，所以要好好利用，我自己就好想開一間 café。自己中過最勁嘅橫財，最勁都係一千蚊，而另一次我記得係千嬅新碟發布會，當中有抽獎，幾乎所有人都抽到一千蚊獎品，但都係只得我抽唔到，所以我諗我冇咩橫財命喇。
郭政鴻：買大屋
首先再加厚我兩個女學業嘅基金，等佢喺學業上有一個好嘅保障，買過另一間再舒適啲嘅屋，等一家人可以一齊住唔會唔做，但會撥多啲時間畀屋企人，將生意再搞大少少，我冇咩抽獎運㗎，最叻仔試過抽中一部手機。
陳瀅：幫狗狗
首先係請假，同婆婆環遊世界，因為知道佢年紀大啦，我就孝順番佢，之後就想建立一個動物基金，因為見到人對啲動物唔好，特別狗仔，所以好想保護佢哋。我自己冇賭運同橫財命，當年夠年紀入賭場，試過玩下，玩百家樂同大細，全部輸晒。
白只：搞舞台劇
我會將嗰筆錢唔係用嚟投資，而係攞嚟使晒佢，點使呢？應該要做一個舞台劇，做一個演唱會，然後再做一部電影，我就可以揾晒我所有朋友，同埋我好欣賞嘅人一齊合作，我諗咁樣係最瘋狂㗎喇！自己中過嘅橫財，最勁就係超市 100蚊代用劵啦，我覺得好正喎！我有用到呀！
中大獎點算？
街坊：有錢去外國住
大家都想中頭獎，唔使等出糧，後生仔個個都會實現夢想，唔會第一時間話買兩層樓先，有人話有錢都唔會喺香港住，咁赤化，俾我都走啦。
即時報料 facepop
熱線： 9222 0828
電郵：facenews@nextmedia.com
facebook： Face Magazine inbox
line、 we chat id： facemagazine
|
鍾意就快D Share啦！
|
|
|
