邵仲衡拍咗 5個月《瑪嘉烈與大衞》，同黃心穎家姐黃心美首次合作，以為長拍長有，點知突然被 out。
真面目
被消失 ViuTV開台劇林保怡硬頂 邵仲衡被飛：實有唔開心
4月 6日我哋就有多一個免費電視台 ViuTV睇，但開台劇《瑪嘉烈與大衞》嘅男主角邵仲衡，未開台就被 out，由林保怡頂上。
有傳「大佬孝」邵仲衡因為演法太老式而被飛，自稱上星期先知要離隊嘅大佬孝就話雖然冇嬲，但心裡面實有唔開心。
ViuTV開台劇《瑪嘉烈與大衞》嘅先行網上版已經播咗十幾集，作為電視版嘅前奏，同足本版內容完全唔同，而拍攝咗 5個月嘅邵仲衡卻突然被飛起，戲份只能夠出現喺網上版，開台嘅正式版就由林保怡頂上。
「我都可以揀㗎！」
有傳邵仲衡被 out係因為 ViuTV製作部副總裁金廣誠不滿佢演法太老土，週日大佬孝喺電話回應事件：「上年金廣誠搵我拍呢套劇，梗係信佢佢話呢個係分階段喺網上播，開台後電視會播，但 format會唔同，人選會變。因為我簽約到今年 10月，所以諗住會一直拍落去。」佢又話：「但之前金生打俾我，話會進入另一階段，想要求有新鮮感，所以要停一停，會安排其他後續俾我做。睇報紙至知換咗林保怡。其實我真係冇嬲，如果問我係咪唔開心，實有唔開心！因為唔捨得呢班對手同台前幕後。」
至於金廣誠係咪已安排邵仲衡做其他節目，邵仲衡就話未有，而手頭上已接咗有線同港台 3個節目，所以唔會冇嘢撈，對於有冇興趣再幫 ViuTV拍劇，佢就笑住話：「你鍾意搵我，我都可以揀㗎！」至於幾個月前《瑪嘉烈與大衞》因為頭幾集拍得太差而曾經停工，大佬孝就解釋唔關佢事：「頭兩個月拍咗十幾集，換咗導演，之前都解釋過。」
ViuTV公關部簡小姐對邵仲衡被換角一事就解釋：「呢套劇係與別不同，個個人都可以係瑪嘉烈同大衞，就算網上版都有幾個人做過大衞，所以電視版想有新鮮感至搵林保怡做。」本刊亦收到 ViuTV首個節目表，自製劇集暫時只會喺星期一、二播，而且喺晚上 11點只播半小時，真係好有新鮮感，觀眾要習慣吓喇！
節目多 gimmick
除咗拍劇， ViuTV主攻實況娛樂節目，但唔係飲飲食食咁老土，打頭炮嘅有《跟住矛盾去旅行》同埋女子格鬥《 G1格鬥會》，齋睇預告都幾吸引。
《 G1格鬥會》係 8位全女班真人格鬥節目，全部女藝人同 model，未出街已傳不和，劉燕妮（ Rika）埋怨被黎美言（ Winkie）打到毀容，同唐紫睿聯手杯葛 Winkie；龍小菌同郭思琳則幫 Winkie，暗指 Rika同唐紫睿博宣傳，真係七國咁亂！
採訪、撰文：娛樂組
攝影：攝影組
|
鍾意就快D Share啦！
|
|
|
