真係「橋唔怕舊，最緊要受」，近日涉及多宗駕駛學校騙案的e-pass，今日元朗、旺角等分店繼續關門大吉，而幕後老闆、被稱「低智老千」的吳偉倫仍然「潛水」，一直未有現身。不過《蘋果》取得吳偉倫在旺角總店打躉的獨家片段，由自稱熟識吳偉倫騙局手法的John今年2月拍到，他更大爆這名老千重出江湖的來龍去脈。「佢啲手法全個旺角都知啦，一早畀人black list晒！」阿John透露，吳偉倫於20年前一直藉着開設駕駛學校，以「一條龍」代辦車牌和駕駛訓練課程，吸引準車主報名後採取拖字訣，最後全線結業就玩失蹤，因此旺角多個商場早已將他列入黑名單，拒絕租舖給他。據阿John所知，去年8月起，吳偉倫在旺角租舖欲重施故技卻處處碰壁，最後只好找來「拍檔」凌耀龍出面，並想到借「長洲糯米糍」過橋，凌聲稱自己來自長洲，又言之鑿鑿稱「長洲糯米糍」衝出巿區已開設7間分店，租舖全為擴張業務並同時提供出租長洲渡假屋的服務，因而取得業主信任，於去年底成功租下旺角總統商業大廈1樓106號作總店。惟該店甫開張貼出e-pass招牌，有人已深知上當立即報警求助，「西九派人嚟拉人，不過最後警察都冇佢符。」據阿John所知，旺角e-pass開舖不久已欠租，業主只好請來執達主任上門，有人疑深怕騙局提早「爆煲」，硬着頭皮多交兩個月租，惟至今年3月起又再次欠租，目前執達主任已發出6月收舖通知。想睇最新消息？ 即時follow【現場－蘋果突發】fb！http://fb.com/applecitycrime
|
鍾意就快D Share啦！
|
|
|
