ViuTV開台，搶灘成功，令無綫黃金檔收視齊跌。ViuTV開台最高吸52萬觀眾，《太陽的後裔》同《跟住矛盾去旅行》最高有8點收視。當時無綫解釋是賽馬日流失觀眾所致。咁噚日(周四)冇馬跑，收視如何？無綫等不及下周一喇，今日突然主動公佈周四收視，晚上兩線劇及《Do姐有問題》收視僅微升。《末代御醫》微升1.4點，《EU超時任務》微升1.5點，最後《Do姐有問題》升得多啲，升2.3點。其實ViuTV開台之前，無綫黃金時段兩線劇《末代御醫》和《EU超時任務》一路都收視平穩，平均收視分別係24.7(約161萬人次)和24點(約155萬人次)，最好口碑又高收視嘅《Do姐有問題》，亦錄得高達20.6點(約134萬人次)收視。(編按:每1點收視約64,910萬人次)4月6號，ViuTV開台日，無綫收視急跌。8點半檔嘅《末代御醫》同踏入結局周嘅9點半《EU超時任務》，平均收視分別報20點(約130萬人次)和21.5點(約139萬人次)。至於10點半嘅《Do姐有問題》跌到1字頭，報16.7點(約108萬人次)。咁無綫點解畫？報稱4月6號係賽馬日，所以影響咗啲馬迷，去睇馬，冇睇劇。今日呢，無綫主動公佈4月7號(即周四)嘅收視，《末代御醫》平均收視報21.4點(約138萬人次)、《EU超時任務》報23點(約149萬人次)，最後《Do姐有問題》都係得19點(約123萬人次)。全線微升。嗱！公平啲，幫無綫自己同自己比較一下，佢哋喺ViuTV開台後嘅收視：《末代御醫》流失約8萬人次
《EU超時任務》無咗約10萬人次
《Do姐有問題》係最甘，走咗15萬人次總括而言，雖然無綫整體收視係有輕微回升，但係暫時未去得番之前嗰個位。究竟關唔關班馬迷事？(溫馨提示番，無綫以賽馬日為由解釋收視跌已非首次，2013年網民發起全城響應熄電視日，令無綫當晚收視下跌，最大跌幅係4點，約流失26萬人次，但無綫即自圓其說所言:「每一收視點:64,200，根據過往收視報告，每逢周三夜馬賽事，收視會較平日稍低(約2至3點)。」)相關新聞：
【ViuTV搶灘成功】《太陽》《矛盾》收視最高 無綫黃金時段收視跌
http://bit.ly/23oTnHa
|
鍾意就快D Share啦！
|
|
|
