無綫劇《殭》男主角鄭嘉穎為慰勞一班台前幕後，在渣甸山設宴三圍，非常有心！出席演員包括其女友陳凱琳（Grace）、陳嘉寶（Anjaylia）、賴慰玲（Winki）及陸永等，場面熱鬧。
睇劇回味甜蜜
Grace表示《殭》是她與嘉穎的定情劇，近日會盡量一齊睇互相提點，更勾起不少甜蜜回憶：「佢成日鼓勵我，好開心。（有咩Sweet回憶？）拍嗰陣其實未一齊嘅，年幾前，依家都過咗一周年，不過睇番嗰幾場古裝戲特別sweet，當時得我哋兩個對手戲，有朋友睇完都話好Sweet，明白點解我哋會走埋一齊。」講到不少觀眾讚Grace的演出比《張保仔》時好，她直認更淡定，問是否多得嘉穎借碟助她提升演技？她笑說：「好多場佢都喺度，有佢睇住係會好好多！」
劇情新穎唔理收視
嘉穎表示劇集已播了三分二，特設宴為台前幕後打氣：「希望大家加油！唔係黎生（黎明）金句咁叫大家去死，係真係想幫大家打氣，拍呢套劇唔同一般口水劇，又多打戲又多CG，係辛苦好多！」對於Grace直認睇劇時勾起很多拍攝點滴，嘉穎亦冧笑說：「係有好多回憶嘅！（最難忘古裝場口？）係舊年情人節、新年年初幾嗰陣拍，連續幾日得我哋兩個日對夜對。」他又讚Grace表現愈來愈好，並笑將劇集《四個女仔三個Bar》講成《四個Bra》：「佢哋『四個Bra』團隊合作過，我對佢哋好有信心。（情侶檔再合作？）短期內應該唔會住，個別發展下先，我會接新劇，今次佢就冇份。」講到收視，嘉穎表示今次題材新穎另類，難免有風險，因此不太重視收視如何：「我希望觀眾多啲選擇，要套套一樣，不如睇《愛．回家》啦，呢類劇已經有，希望試新嘢。」
下周《殭》結局篇愈來愈精彩，嘉穎更推介必睇劇情：「有隻最好打嘅殭屍會出場，一男一女，男嘅終極勁，我演嘅刑活著都唔夠打，畀佢打到重傷！（同謝安琪、Grace三角戀感情線？）唔穿得，總之好耐人尋味，你又未必估到嘅。」對於早前謝安琪的身材成為網民焦點，Grace說：「我女仔就冇咩留意，但有Talking Point代表大家有睇。」嘉穎則無奈地說：「觀眾品味係咁冇辦法，叫監製拍多啲囉！」
|
鍾意就快D Share啦！
|
|
|
