87年港姐冠軍楊寶玲，一次出席活動時，自爆當年的港姐后冠，是如假包換的——假貨，絕非鑽石后冠。當時楊寶玲說:「鑽石同白金都係假嘅，連18K金都唔係，我仲一直想問TVB要番個真嘅返嚟！」更笑言「假后冠」擺咗喺書房，保險箱都慳番。楊寶玲更稱，由97年開始，六X珠寶贊助港姐后冠，這才有真鑽石后冠喎。咁97年主權移交之前最後一屆港姐——即係96年李珊珊嗰屆，后冠係18K定真鑽石？珊珊今早接受《蘋果》電話訪問，聞言即笑道：「我嗰個后冠係金雅典贊助㗎！係真鑽石嚟㗎大佬！都成百幾萬㗎！」爽直依然呀！當年珊珊除咗捧走后冠，仲一口氣擸埋最上鏡小姐、才藝小姐大獎同最受傳播媒介歡迎大獎，當時除咗價值過百萬嘅后冠，仲獲得三個鑽石扣針同一支權杖，問珊珊會唔會一次過拍賣埋，佢就話：「今次只會拍賣后冠，其他嘅獎品就未諗過會拍賣。」珊珊又謂：「其實你問我呢件事，都係自己一個好大嘅決定，因為嚟緊要面對好多問題同質疑。其實呢一刻都未有具體方案，但呢件事進行唔可以太草率，所以我想統一口徑嚟答，因為驚有唔同版本出嚟，將件事扭曲咗。」問到會唔會搵慧妍雅集嘅人幫手，珊珊就話暫時未有呢個諗法，亦未必會搵拍賣行。珊珊話：「還好我身邊認識嘅長輩、朋友喺做慈善方面都好有經驗，我可以請教佢哋。」
來源 source: http://hk.apple.nextmedia.com
|
鍾意就快D Share啦！
|
|
|
