伍詠薇(伍姑娘)老公練海棠今日被周刊爆佢同34D長髮女車震，伍姑娘今朝就氣定神閒咁回覆《蘋果》話冇問題，下晝佢就為有線節目《伍姑娘真識食》錄影。年過半百嘅練海棠竟然背妻偷食34D屋邨長髮女，二人唔單止嘆白酒，更去咗南灣沙灘匿車廂兩粒鐘夜會，伍姑娘今朝以WeChat回覆：「冇問題，冇乜特別嘢幫到(回應)，今日我要做嘢，有記者嚟，可能大群啲，到時我一嘢公開交代我要講嘅嘢。」佢仲話自己呢刻充滿正能量添！講得出做得到，伍姑娘今日下晝就好正能量咁工作，幫有線節目《伍姑娘真識食》錄影，今集佢請咗歌手林奕匡去到中環蘭桂坊錄影。伍姑娘今午2點幾坐有線公司車到場，冇坐老公載34D屋邨妹去南灣沙灘相聚兩粒鐘嘅7人車，問她心情可有影響？伍姑娘笑道:「有呀!(有咩影響？)俾你哋《蘋果》一早嘈醒咗囉，哈哈哈哈。」老公有冇道歉？「我一早出去整頭髮，我都冇時間，傾咗少少就出嚟喇。」咁傾咗啲乜？伍姑娘繼續笑:「傾咗少少，我同佢講：『你講一次俾我聽吖！』(佢有冇…)冇！好平心靜氣嘅，冇乜嘢傾咗嘅，但內容就毋需要同大家交代。」問到佢老公有冇偷食，佢就話：「應該冇，有同老公傾咗一陣，不過唔需要同大家交代。（係咪偷食？）唔係嘅，等我了解中？」那伍姑娘是否特登唔坐嗰架媾女戰車？「你都黐線嘅，唔好咁傻啦，梗緊係唔會」伍姑娘又指已知道成件事：「佢的確係抵打蘿柚嘅，平時我幾……我幕前幾癲都好啦，呢啲回應.....家事我哋會慢慢處理一吓先，真係嘅，呢個唔知係開心，或者係好唔開心嘅事，都未知係咪唔開心。所以呢啲家事，我會返到去同我先生坐低傾一傾，瞭解吓發生咩事先。實在好抱歉要大家去擔心、或者睇到呢件事，無論家人、朋友、fans或者記者，好抱歉。」
|
鍾意就快D Share啦！
|
|
|
