戶外 K
麥潔文開住羅文及甄妮合唱《世間始終你好》的片段，然後高唱女音，顏聯武及江華做男音，十足戶外 K一樣，好過癮。
娛樂偵訊
江華顏聯武野外舞鬥 麥潔文黑絲放狗
大熱天時，平時好鍾意行商場歎冷氣的江華，竟然破例陪老友顏聯武去放狗，行到大汗疊細汗，熱到上腦！江華更忽然興致大發，唱住歌跳踢躂舞；同行的麥潔文亦唔輸蝕，出動黑絲襪放狗，兩公婆各有千秋。
突然師父到
江華去年雖然由沙頭角搬到月租$33,000的上水歌賦嶺三層獨立屋，但始終離不開住慣了的新界區。
日前，記者見江華離開住所，揸車到雙魚河附近一個屋苑，泊低車後，轉頭便拖住隻狗和老友顏聯武一齊出現，至於怕曬的麥潔文，就擔住遮跟後，呢個放狗團，造型已極富娛樂性。
發福了的江華，過去的鋼條身形較乾瘦，如今長了肌肉，反而更有睇頭；與顏聯武邊行邊講，老婆麥潔文就拎住部電話四圍影相，三人沿住上水金錢路行了廿分鐘左右，才停低在路邊的涼亭抖一抖。
面對大片綠草，五十三歲的江華突然「師父到」，自娛跳踢躂舞，顏聯武亦技癢，跟住江華的步伐跳，又用電話研究網上踢躂舞影片，參考完再跳過。兩個加埋過百歲中佬，前後跳足半小時，仲好有活力。
對黑羊唱歌
之後三人坐在涼亭閒聊，其間用手機上網睇住片的麥潔文，突然大大聲唱「在世間，自有山比此山高……」嘩，郊野卡拉 OK，連開 K房錢都慳埋！
麥潔文做女聲，顏聯武就唱男音，唱了兩句，江華亦嚟料，結果好似開戶外演唱會一樣，好 free！唱吓停吓商量吓音準，唱完一次又一次。
回程途中，遇見一群黑羊，最近迷上黑絲的麥潔文即刻走上前，將群羊當成跟她學唱歌的學生，運氣開聲；江華則為老婆影相，放狗變野外 K，江華同麥潔文，天下無雙！
月底開個唱 月底開個唱
顏聯武憑一把磁性聲音，成為電台當紅 DJ，由商台跳槽到新城，現為網台 D100大戲台台長外，亦負責 D100香港台多個音樂節目，其中唱 Live嘅《 Keep on singing》，就不時請歌手上節目同場對唱。
唱得！粉絲隨時唔少過班歌手的顏聯武， 91年被滾石唱片睇中，出過多張專輯。唱咗廿幾年，今個月底 7.31，終可在旺角麥花臣體育館開個唱。聞說有好多圈中人捧場做嘉賓，江華兩公婆都應該走唔甩
同黎明同班 江華唱過主題曲
（ 1）同老友顏聯武又跳又唱嘅江華，當年曾在節目《都市閒情》做評判，狠評參賽者娃娃舜。但佢唔係得把口，真係唱到兩嘴！
（ 2）老婆係歌星兼歌唱老師麥潔文，江華歌藝亦見得人。早喺佢孭飛嘅亞視劇《我和春天有個約會》已經露過兩嘴，之後過檔拍大台劇《九五至尊》，唱主題曲《彩構步》，拍埋 MV，好認真㗎！
（ 3）退隱多年，就算間歇性復出，都同唱歌有關。 13年，江華應內地電視台節目《年代秀》邀請，使出比劉華更劉華嘅台風， chok住唱《你你你為了愛情》，就令班內地觀眾𠵱嘩鬼叫。
（ 4）有歌癮冇戲癮，其實江華同歌手都幾有淵源。除咗有個歌星老婆， 86年讀亞視藝訓班，同屆同學就有個當年由英國回流返港嘅黎明。
撰文、攝影、攝錄：娛樂組
|
鍾意就快D Share啦！
|
|
|
