唔講廢話，《Pokémon GO》開服了，家陣大家應該落晒街捕捉小精靈，唔想盲頭烏蠅四周搵搞到中暑，不如聽下小編以下10個建議：
1 鎖定Pokestops密集地區
雖然Pokemon屬隨機於地圖出沒，但綜合各地玩家心得，在Pokestops附近較易觸發Pokemon，故此到訪一些Pokestops密集地方如市區等（以小編為例在大埔海濱公園），潛在收獲會大啲，大家仲可以轉動Pokestops拎道具來補給呢。
2 玩家行孖咇
地圖發現的Pokemon每次只能供一位玩家捕捉，獨行俠能獨食所有收獲固然好事啦，但事實上複數玩家共同行動會增加搜索範圍，更有效率。
3 Pokestops等於Ingress！？
有人會發覺Pokestops的位置唔一定是具代表性的「地標」，以小編身處的大埔為例，墳墓、遊樂場一條滑梯、教堂門口名牌都可以係Pokestop！原來Pokestops的定位幾乎源自官方另一款GPS遊戲《Ingress》，換句話說，Ingress的陣地等於Pokestops。如果玩家對《Ingress》較熟悉，咁透過此作可更方便找尋Pokestops。
4 留意樹葉飄散
Pokemon出沒是咪無跡可尋？未必，除左Pokestops附近有較大機會外，亦要留意地圖上有樹葉飄散的地方，遇見小精靈的機會也會增加。
5 紫色香氣趕快去
之前的教學有提過，Lure Module和Incense都可以令周遭散發吸引小精靈埋身的紫色香氣，限時30分鐘。前者設置於Pokestops，後者可隨時在自身散發。如果大家行行下見到有人放紫色香氣，趕快去捉埋一份！
6 善用指南針
雖則地圖顯示是依據Google定位系統，但地圖畫面「花哩碌」，多轉幾次大家好易無晒方向感，呢個時候最好撳一次畫面右上的指南針，角色就會重設視點方向，明白冇？
7 孵蛋同樣重要
成功捕捉小精靈一次基本有100xp，發現新品種更會追加500xp，而轉動Pokestop一次有50xp，咁樣升呢真係龜速。如果轉動Pokestop時有發現到寵物蛋Poke Egg，記得擺佢落孵蛋器，每次孵一隻蛋。Poke Egg會顯示玩家所需步幅來孵化，例如2km即代表玩家行2km就會孵化，而成功孵出新品種再加500xp！所以大家尋找小精靈時順便孵蛋，有效率得多。
8 丟精靈球 唔使急最緊要快
之前小編介紹過點樣旋轉精靈球再擲出達至CurveBall，呢個技巧係實戰來浸淫的。但係「唔使急最緊要快」，事關閒置一定時間小精靈是會逃跑的！所以盡情擲吧，一日未將小精靈收進精靈球，一日精靈球都唔計消耗的。
9 關掉AR鏡頭
長氣都要講，玩《Pokemon Go》超食電，當中AR實境擴充功能超Chur手機資源，所以建議大家捕捉小精靈時撳畫面右上關掉功能。此外遊戲也提供Battery Saver選項，開Game時無預設，要玩家點擊激活，開啟後只要將手機放下，畫面就會變黑，慳番些少電呢。
10 用Incense偷雞吧
返工返學行唔開，或者行得太熱太累要嘆杯咖啡休息，咁就要趁機放Incense吸引小精靈埋身吧。都係一句，小編主張勤奮工作和學習，偷懶是不應該的！（掩面笑速逃）
|
鍾意就快D Share啦！
|
|
|