掃呢頁CODE去手機

2016年8月25日 星期四

醉駕冇工開 羅鈞滿溝掂有米女友 [壹週刊 - 1381] __,羅鈞滿,M1,

7月30日(週六)晚,本刊發現戴罩戴帽羅鈞滿偕新女友出現中環機鐵站,二人著同款波鞋,情侶關係曝光。娛樂偵訊醉駕冇工開 羅鈞滿溝掂有米女友屢犯交通條例的羅鈞滿,早前再衰醉駕幾乎要坐監,形象插水被大台雪藏。行為劣,生活亦唔檢點,便因多次溝女,去年被主播女友張文采狠飛。不過羅鈞滿好本事,最近又溝掂一名家住半山的有錢女。日前,戴晒罩的他與女友孖咇出現中環,之後更登堂入室,返回女方千萬香閨過夜。泊到富貴碼頭 ...


7月 30日(週六)晚,本刊發現戴罩戴帽羅鈞滿偕新女友出現中環機鐵站,二人著同款波鞋,情侶關係曝光。

娛樂偵訊

醉駕冇工開 羅鈞滿溝掂有米女友

屢犯交通條例的羅鈞滿,早前再衰醉駕幾乎要坐監,形象插水被大台雪藏。行為劣,生活亦唔檢點,便因多次溝女,去年被主播女友張文采狠飛。不過羅鈞滿好本事,最近又溝掂一名家住半山的有錢女。

日前,戴晒罩的他與女友孖咇出現中環,之後更登堂入室,返回女方千萬香閨過夜。

泊到富貴碼頭,冇嘢撈的羅鈞滿,日日打波 hea過,冇有怕!

新歡貌似舊愛

喜歡違例駕車,羅鈞滿更加鍾意溝女。去年初,他仍與張文采拍拖期間,涉嫌在韓國首爾夜場因為女人而醉酒鬧事,被警方扣留當地不准離境,搞到要公司搵律師赴韓營救。甩身後都唔識驚,被踢爆背女友偷嗒索空姐 Sylvia,雙雙拍拖外遊。張文采終於死心,決狠飛賤男,並在網上留言,指自己浪費了四年光陰。

俾正印飛、衰醉駕,被大台「生雪」,自斷米路的羅鈞滿原來一樣「有米落鑊」。上月尾,戴晒 cap帽口罩的羅鈞滿,偕新歡著住情侶波鞋出現中環機鐵站,新女友樣貌清純,臉圓圓竟有幾分似前度張文采。

以為成功掩人耳目,羅鈞滿對新歡愈坐愈埋,見女友掛住篤手機,他索性用鴨嘴帽撩對方。



之後二人頭貼頭睇同一部電話,十分 sweet。

返豪宅過夜

二人坐埋一邊各自玩手機,只見羅鈞滿愈坐愈埋,與女友頭貼頭睇電話,又用 cap帽連撞女友的頭幾下,溝女招唔怕舊,只要受!無無聊聊過了半小時,之後二人一齊搭的士,返回女友位於中半山梅道一號 The Mayfair寓所,羅鈞滿登堂入室,在女友香閨過夜。

「阿 Moon(羅鈞滿)無論溝女抑或湊高層都有一手,佢最鍾意對住啲女講到自己幾咁有抱負,只係一直遇唔到機會,講呢啲!偏偏好多女鍾意同佢傾心事。之前氹得掂班高層,所以連衰幾鑊,公司都仲有人肯保佢,仲有得做《勁歌》,但醉駕呢單太嚴重,點都要雪一雪佢。不過咁,校長(譚詠麟)同三哥(苗僑偉)兩個前輩好撐佢,雪完出番嚟又冇事。」一名無綫人說。

百無聊賴約半小時後,被停牌冇車揸的羅鈞滿偕新歡打的走人。

羅鈞滿登堂入室死跟到新歡家過夜,對方住中半山梅道一號 The Mayfair,市值呎價逾四萬,非一般富貴,羅鈞滿真識揀。

本月初,羅鈞滿(藍圈)跟隨譚校長帶隊的明星足球隊,赴台灣踢友誼賽,大合照中有一戴超神秘女子極似羅鈞滿新歡!

新劇被飛

今年三月,因為醉駕被捕的羅鈞滿被裁判官狠斥:「唔排除要入獄。」但最終被判一百小時服務令,大步𨂾過。屢犯不知悔改,被公司掟入雪櫃,羅鈞滿即時被踢出《勁歌金曲》,原本與鄭嘉穎、田蕊妮合作新劇《迷》,佔戲頗重,但監製王心慰已決定換角。

冇嘢撈,大把時間瘟女的羅鈞滿,近日在微博猛晒打籃球、踢波相,生活依然寫意!

冇嘢撈,瘟女以外就是踢波和打籃球,點都好過飲酒鬧事。

近月被全面停工,羅鈞滿雪藏前最後一劇是下週將播的《巨輪 II》。

冇嘢撈,瘟女以外就是踢波和打籃球,點都好過飲酒鬧事。

今年三月羅鈞滿醉駕超標逾三倍被捕,早前上庭時多番認錯並承諾不再醉駕,最終獲輕判一百小時服務令及停牌。

麻煩友

羅鈞滿入行七年,參加「星夢」後人氣一度好轉,點知大頭症發作,自以為好紅好巴閉,惹事生非,自己玩死自己。

曾被停牌

於 12年至 13年間,因不小心駕駛導致三車連環相撞,獲判罪名不成立;但唔係次次咁好彩,多次違反交通條例的他,最終被罰停牌。

7線當 3線

13年 6月,前無綫新聞小花黃紫盈與當時的同事張文采鬧不和,羅鈞滿以張文采男友身份發聲撐女友,又自稱三線藝人,被網民嘲「 7線當 3線」。

亂噏廿四

HKTV不獲發免費電視牌照,羅鈞滿為擦大台鞋在 fb留言:「王先生勿將自己商業失敗跟社會公義拉上關係」,招引網民圍插。

韓國影裙底

15年 2月,在首爾夜場鬧事,有傳他索油索着火水,醉酒鬧事兼錯溝當地江湖大佬女友,搞到周身蟻。事件鬧上警局,他被扣留禁止出境兩個月,要張文采飛當地接濟,最終由大台派律師營救。

偷食被飛

同年 7月,被指瞞住張文采偷嗒索空姐 Sylvia,終被拍拖四年的正印狠撇。

撰文、攝影、攝錄:娛樂組


鍾意就快D Share啦!