「由於天氣酷熱，老人及孕婦將優先安排座位，敬請體諒。」出街食飯等位在所難免，但炎炎夏日，戶外等位時熱浪逼人，長時間等候的話，再冷靜的人都會感到不耐煩，如果此時再看到這張告示，你會有甚麼想法？是認為店舖的安排好窩心，還是「大細超」對待客人不公平？元朗一間餐廳就貼出了這張告示，女店主指，優先入座的理念猶如交通工具上的關愛座，但認為元朗人親切易相處，不會出現各種規限和壓力，只希望每個客人都可「食得舒服」。
仍是2字頭的女店主阿斯表示，餐廳只開業3個月，近日打響名堂後開始出現人龍，有見天氣愈來愈熱，加上不時有孕婦和行動不便的老人家到場排隊，所以有此優先入座的安排，「自己都做咗媽媽，知道大肚時有幾辛苦，就算唔係咁，平日見到老人家撐住拐杖等咁耐，個心都過意唔去啦。」她表示，店內最多只有約30個座位，加上食物需即叫即煮，客人最多可等逾一小時才能入座，「我哋人手唔夠，得一個廚師睇住4個爐，上菜比較慢，繁忙時可能真係要等。」
東網記者到位於元朗鳳翔路的C3食肆，訪問食客對此安排意見，有人激讚認為好窩心，亦有人不以為然。甫步出餐廳的陳小姐，形容該店抵食又體貼，「天氣咁熱，老人家同孕婦一定仲辛苦，好贊成有咁嘅安排，佢哋都應該享受到好食嘅食物！」至於上了年紀的陳先生則認為有關安排或屬多此一舉，「好似冇咩需要囉，如果講老人家嘅，睇下去到幾老啦，我都可以叫老。但如果係孕婦，都應該畀佢入去坐先嘅。」
「之前冇寫紙嘅，都試過有客人會不滿。可能係我哋溝通不足，忙得滯冇同客講清楚，佢哋等得耐，又唔知點解人哋可以入先，就會燥底啦。」因此，阿斯決定白紙黑字，標明餐廳正實施老人孕婦優先入座的安排。大着肚子的孕婦就睇得出，但怎樣才可算是「老人家」？「呢個就靠我哋同夥計自己判斷，見到啲行動不便、撐住拐杖、要人扶嘅就一定會畀佢入先，但如果有啲仲係幾年青、健步如飛嘅，就可能會麻煩佢等多陣啦。」阿斯指，作此安排只希望人人都可舒適地用餐，「就算係我哋屋企人同朋友，嚟到都係要等位，我哋企得好硬。」
現時該店全日只統一發售$40的意粉餐，阿斯慨嘆元朗飲食業競爭大，轉手非常頻密，一旦欠新鮮感則容易以結業告終，該店亦拒做外賣，因人手不足「做唔切」，不想再加長客人等候時間。而除了安排優先入座，該店侍應又會不定時向等位客人派發冰水。為紓緩高溫之下曝曬的不滿，阿斯更有計劃之後添置冷風機放在店門外，甚至申請戶外牌照加設簷篷，「等生意穩定之後先會有其他計劃，依家貼告示出嚟都有壓力，但人哋點諗我控制唔到，開舖都唔係要發達，如果唔係就唔會賣咁平啦。」
|
鍾意就快D Share啦！
|
|
|