前港姐冠軍翁嘉穗於99年下嫁比她年長近二十年的海馬集團老闆鄔友正。97年的翁嘉穗才23歲，還在加拿大讀書，那時候選美是盛事，大台會派人到外地招攬，她獲同學提名，如果入圍就會獲送機票返港參選，她說當時其實純粹被那張機票吸引，她笑說：「我覺得參加無壞，可以學吓嘢，如果當年冇參選，我諗我會做銀行。」以玩耍性質參選，無心插柳摘冠。她表示自己性格不適合娛樂圈，所以當選後認識了丈夫鄔友正，拍拖不久就結婚，翌年誕下長子鄔謨雲，孻子鄔謨風今年才剛滿一歲，相隔十五年再產子，兩兒子相差十五年。
信任都老公唔怕有飛來蜢
翁嘉穗透露母親在她很小的時候就過身，所以從小她就憧憬組織自己的家庭。談到她的丈夫家景富裕，嫁入豪門可會有壓力，她說：「我先生係白手興家，佢唔係公子哥兒，佢係自己捱番嚟，佢好慳家，佢啲衫會着好耐。而奶奶就好隨和，好錫我，完全冇問題。」翁嘉穗說當年結婚一切從簡，她希望二人結婚二十週年時可以再拍一次婚紗照，談到兩人的相處之道？她笑言都是老生常談，不執着、多包容，她續說：「佢都有啲脾氣，我就出名冇脾氣，朋友成日笑我話我啲仔梗係唔驚我啦，話我鬧人咁細聲，但我覺得自己已經好大聲，大聲到有啲喘氣，我唔係好夠氣，哈哈！我後生都有團火㗎，乜都拗一餐，不過次次拗完都發覺佢講嘅嘢係啱，後來大咗，咪聽佢講囉，佢都係為我好啫！（會唔會擔心老公有飛來蜢埋身？）佢唔會，佢身經百戰，知道有嗰啲問題（緋聞）好煩，（好信任佢？）我唔會Check佢，我唔係呢種人！」
老公計劃好將來生活
雖然翁嘉穗擁有做「少奶奶」的條件，不過翁嘉穗也喜歡工作，自薦幫丈夫發展業務，主要成立了副線，走生活品味路線，也有為公司旗下店舖引入精美碗碟及香薰等，成功令公司形象年輕化。她說丈夫在工作上給她很大的自由度，讓她發揮，很尊重她！鄔友正對她十分疼錫，問到二人相處間最感動的事？她笑說：「佢個人比較靜少少，唔係咁多甜言蜜語，最欣賞佢好叻，家庭觀念好重，亦都係一個好有計劃嘅人，佢成日鋪排定佢走咗之後嘅嘢，確保我將來生活安好。」她指丈夫十分注重健康，吃得十分清淡，沒鹽沒糖，又學詠春強身健體，為的，是想跟她有更多的時間在一起，走更長的路。年輕時，我們都追求轟烈的愛情，經過歲月洗禮，留下來淡淡的愛，才能細水長流！
|
鍾意就快D Share啦！
|
|
|
