【短片】【獨家有片】擊退正印？弗爆苟芸慧 任疑似銀礦大王後人啜爆
2016-09-21 02:41:00 HKT
採訪、攝影：黃曉程、羅德光、朱志聰、陳辰
苟姑娘呢個動作係咩意思呢？
同場白衫嘅男子係苟姑娘嘅細佬。
最後三人一齊離開。
苟姑娘好冇癮企埋一邊。
個男性朋友同苟姑娘面貼面，仲好似錫咗佢一啖。
本月17號苟姑娘被影到同一個疑似陸恭和嘅男性朋友去電音音樂節。
上咗架Tesla電動車離開。
苟芸慧近排成功減磅，多年搣極唔甩嘅「肥苟」稱號，正式除名！
變返做「苟姑娘」嘅佢，近排桃花好旺盛！先後同湯珈鋮、葉樹堃細仔葉瀚華傳緋聞。不過苟姑娘通通話得啖笑。
原來，真命天子，係另有其人！近日苟姑娘盛傳同賽車手兼公和建築創辦人陸孝佩個仔、亦係馬來西亞錫礦大王陸佑後人嘅陸恭和打得火熱！之但係，亦有消息指陸恭和其實有個前主播女友張頌恩！
疑似又落錯盤嘅苟姑娘，以為會鳴鼓收兵，以為係……
本月17號，《蘋果》目睹着住灰色貼身T裇嘅苟姑娘，去睇西九舉行嘅「世界頂級電音舞曲音樂節Road to Ultra」，同行有佢細佬，仲有一個貌似陸恭和嘅男士。
當晚約7點，苟姑娘一行人現身VIP區，平時唔煙唔酒唔跳嘅苟姑娘，表現唔算好投入。見佢有時坐下，有時企起身望下咁，就算聽到啲好high嘅音樂，都冇乜反應。
到咗9點半，壓軸表演嘅DJ出場，頭戴黑色cap帽、貌似陸恭和嘅男士諗住出去台前睇騷，仲想拉埋苟姑娘出去o添。喺現場見到佢又玩又跳，又食電子煙，但係苟姑娘喺台邊都係冇反應，齋陪住呢位黑色cap帽男。
睇到咁上下，兩人都攰喇，苟姑娘就行去VIP區側邊嘅欄杆吹水，貌似陸恭和嘅男士哄個頭埋去，仲錫咗苟姑娘一啖。錫一啖都唔夠，仲疑似喺耳邊「啜啜啜啜」咗好多下。
到晚上10點半左右，佢哋行出會場上咗架Tesla電動車離開。
噚日苟姑娘回應傳媒時，以短訊回覆指cap帽男係「朋友」，追問佢係咪緋聞男友陸恭和？苟姑娘避答，只表示：「我同一群朋友去。」記者見到cap帽男同苟姑娘姐弟一齊走，苟姑娘就話：「細佬請我同班friend去Ultra欣賞music，好簡單嘅一件事唔好再賴落去我啲緋聞喇！」 但cap帽男全程黐實咬耳仔喎，苟姑娘就話：「太多人喺現場，冇咩空間，大家黐住大家欣賞music show。」問到 o依家有冇男朋友？有冇人追求？苟姑娘坦白得好可愛話：「現階段有追求者，但私人嘢就唔想講嘞，多謝大家關心喇！」
|
鍾意就快D Share啦！
|
|
|
