【短片】【唔係講張致恒】宣佈同諸葛紫岐擘面 莊端兒：有人要我做超越底線嘅嘢
2016-09-22 14:40:00 HKT
(攝影：沈健程)
一件偷食事件，引伸到事件男主角張致恒話要睇醫生，要醫咸濕病，再伸延到女主角莊端兒同好姊妹……或者係好同事呂晶晶嘅駁火！
今日女主角莊端兒開記者會。着住全身黑look嘅佢，架起黑框眼鏡，收起重點Ecup，一臉慘情交代事件。原本以為佢係打算交代男友張致恒嘅偷食事件，邊估到……重點唔係張致恒，而係佢嘅經理人諸葛紫岐！
莊端兒記招聲明如下：
「就近日我同張致恒發生嘅事，辛苦大家連日嚟嘅奔波啦，一段感情關係發展到呢個地步呢，我都覺得可惜嘅，畢竟感情事係我哋兩個人嘅事，佢錯咗，佢都已經認咗錯，我哋亦都正式分咗手啦，咁我已經原諒咗佢啦，我希望事情可以告一段落，我亦都好希望無論係我定係張致恒，都可以搵到自己嘅幸福。」
「咁近排呢件事，令我有好大壓力，其實一直以嚟，喺我工作上所發生嘅事，令我有更加大壓力，自從我自資出寫真集之後，喺今年8月5日，我已經向我經理人－－諸葛紫岐小姐發出咗律師信，單方面提出終止我哋嘅合作關係，咁……至於點解我要解約呢，我唔方便講太多，其中我可以講嘅係，喺我哋呢段合作關係裏面，有人想我做一啲超越咗我底線嘅事，而我係一而再、再而三去拒絕嘅！宜家我哋處於冷靜緩衝期，喺呢一段期間，我唔希望有人再用我嘅個人資料，再去接洽工作。如果喺呢段期間，有人用我嘅個人資料，去接洽工作，而導致第三方有所損失，我莊端兒唔會承擔任何責任，並且保留追究權利，我今日講嘅係咁多，多謝大家！」
來源 source: http://hkm.appledaily.com
|
鍾意就快D Share啦！
|
|
|
