勝出法團選舉當晚，一班太和的後裔到邨內酒樓食飯慶祝。（關注組成員提供）
眾人諸事
「太和的後裔」起義成功 千萬工程五十萬 KO
大埔太和邨年中爆出圍標疑雲後，居民自發成立關注組，成功爭取天價工程重新招標。本週日，佢哋派出嘅十名居民，更獲九成九業權人投票支持，成功踢走由民建聯成員做主席十幾年嘅舊業主立案法團，充分體現「太和的後裔」嘅團結同民主選舉精神。
太和邨有大約五千戶業主，星期日業主大會有近四成、即係一千九百名業主或授權人出席投票，支持由太和的後裔組成嘅新法團，對比平日業主大會得二百人參與，人數差一大截。
關注組唔少成員都係「抗爭素人」，見條邨出事先第一次上街。呢三個月佢哋為選戰幾乎日日開會日日見，企街站收集簽名同宣傳。核心成員 Cherry喺新法團當選後形容，今次「仲辛苦過立法會選舉……選前好多居民都話嚟，但我哋好驚佢最後唔嚟」，最終抗爭成功。
Cherry強調勝利背後，最重要係邨民真正關心條邨，「咁就算第二日（新）法團班人變咗，我哋都可以拉佢落嚟。」新任法團主席任肖雲拍心口話會提高法團透明度，包括 facebook直播開會，佢同 Cherry仲好有信心之前單千萬外牆工程，最終可以約五十至七十萬過關，即係原本天價工程費嘅百分之二左右。
成員為選戰踢 Job
話說改選法團前一日，有「太和的後裔」成員同原來法團成員起爭執，更疑被對方推跌受傷須送院。受傷成員阿偉喺新法團當選後興奮形容：「依家幾痛都唔理啦，贏到，足足搞咗三個月……最後終於贏到，係希望嘅結果，（心情）唔係言語可以形容。」
阿偉仲話：「依家條頸仲扯住，一路扯到落條腰、背脊嗰度，頭暈同嘔就少啲喇。」本身做 freelance剪接嘅佢透露，最近三個月經常「踢 Job（推掉工作）」，有一個月冇開工，全因要投入選戰前準備工作。
至於被指抱 B打人嘅，係舊法團委員兼新界社團聯會大埔區理事姚錦嫦。阿偉話已經去警署落咗口供，但就未知警察點處理，「我冇諗到佢會推我，諗住幾十歲師奶，最惡都係潑婦罵街。」
朱凱廸明踩鄺神 被翻泥頭山搶鏡舊賬
「票王」朱凱廸近期人氣急升，但紅過炸子雞嘅佢最近喺 TVB專訪中笑住批評超區票王鄺俊宇，話成日聽到對方講自己一年接二千個個案「都幾難頂」，因為佢覺得做立法會議員嘅任務「唔係接 case」，而係推動香港民主運動。
廸廸做咗尊貴嘅議員後咁講，得罪唔少泛民政黨中人，皆因好似早前天水圍嘉湖山丘，當日廸廸去挖泥抗議，呢個本身同樣係 case，不過就係工黨跟開。知情人士話，工黨年初收到嘉湖山莊居民投訴，於是跟進個案兼開記招，仲有報紙頭版報導泥頭山事件。事後工黨再組織示威，同時廸廸嗰邊想跟進，於是約埋三月二十日朝早九點半去「挖泥」，仲講到明唔好帶政黨或組織 banner。
當日有份喺行動中被捕嘅民進黨楊繼昌就話，佢一直都係用 facebook聯絡「八鄉朱凱廸」專頁嘅管理員，十八號晚「八鄉朱凱廸」話行動當日朝早九點半天榮輕鐵站集合，但十九號晚對方突然稱「為避開鄧氏」，突然改為朝早七點半挖住泥先。
行動前一晚先突然改時間，據悉工黨一早約好街坊，又擔心記者冇咁早到，於是繼續建議九點半，但最終土盟等人七點半去咗挖泥，九點半就公告天下。當日傳媒鏡頭下，廸廸等人早咗兩個鐘到場，帶埋好有土盟色彩嘅綠底白字「倒泥可恥」 banner，喺 facebook叫人立即聲援，傳媒順理成章叫土盟做行動發起人。至於李卓人因為唔可以丟低班街坊，結果「準時」到但變「聲援者」，鏡頭只影住佢兩度想強闖泥頭山，被人指想「抽水」，其實都幾無奈。
當然跟進議題無分先後，但無論元朗橫洲「官商鄉黑」勾結定天水圍泥頭山，其實都係個案跟進，所以千祈唔好睇小冇鏡頭下跟進個案嘅力量。
曾俊華辭唔辭職 689都頭痕
梁振英爭取連任因立會選舉建制派失利而吹起冷風，近期橫洲事件再被踢爆有私通鄉黑之嫌，更隨時成為壓垮 689嘅最後一根稻草，但黑處未算黑，近日名嘴李慧玲引述政圈消息，話財爺曾俊華下個月會辭職參選，而數最頭痕者，非 689莫屬。
鬍鬚曾十月辭職並非空穴來風，睇番上一屆，特首選舉雖然喺一二年二月中先接受提名，但梁振英就喺一一年十月初已辭任行會，再自創「備選人」一詞參選。問題係，鬍鬚曾貴為財爺，每年最重要工作之一就係發表《財政預算案》，如果佢真係辭職，份《預算案》又點收科呢？
查實自梁振英上場後，佢為咗盡攬大權，連《預算案》都要為佢份《施政報告》服務，所以呢幾年兩者都捆綁一齊喺十月下旬開始做諮詢，如果鬍鬚曾真係出選， 689當然會想方設法提早逼走呢個潛在競選對手，費事佢再有機會參與《預算案》制定啦，但財爺辭咗職，就算中央再任命新人選，都一定係臨時臨急接手，如果《預算案》令市民失望， 689一樣被牽連，到時仲要好近特首選舉，睇怕只會令 689行情更加凍過水。
撰文：巫不言
news@nextdigital.com.hk
|
鍾意就快D Share啦！
|
|
|
