(Getty Images)
玩完！「大Sam」上任英格蘭國家隊領隊一職僅只67日，宣布正式玩完，成為史上最短癮英帥！英格蘭國家隊領隊艾拿戴斯被爆疑似收錢教走法律罅一事，喺英國體壇煲足一日，嚟到深夜時份又有驚人新發展！英格蘭足總剛發聲明，證實已同艾拿戴斯解約，理由係佢嘅行為已經唔適合繼續出任英格蘭國家隊領隊一職，而「大Sam」亦已向佢哋承認犯錯同作出道歉！
其實今晨較早時間，已有傳聞指「大Sam」已經根據英足總建議，遞交咗辭職信，不過最終因為事件嚴重性，英足總選擇同佢解約，似係想徹底同「大Sam」劃清界線，保持聲譽。
英足總嘅聲明大意係：「根據今日嘅報道，以艾拿戴斯嘅品行，已經唔再適合出任英格蘭國家隊領隊。佢明白自己犯上嚴重嘅判斷出錯，並作出道歉，但由於佢嘅行為事件性質嚴重，足總同艾拿戴斯都同意即時解約。」
英足總同時強調，今次決定係經過慎重考慮，目的係為咗保住球賽嘅各方利益，以及維持足球圈嘅高尚品格要求。佢哋認為，身為英格蘭國家隊領隊必須喺任何時候，都對球賽懷着誠信同尊重。
至於「大Sam」離職之後，英足總宣布暫時會由U21領隊修夫基喺未來4場，即係對馬爾他、斯洛文尼亞、蘇格蘭同西班牙嘅賽事領軍，以讓佢哋有足夠時間聘請合適新領隊。
SO東波同你追實體壇每個精彩時刻！
http://on.fb.me/1PWMCFH
來源 source: http://hk.on.cc
|
鍾意就快D Share啦！
|
|
|