掃呢頁CODE去手機

2016年10月13日 星期四

告別議會轉投熱廚房 阿人煮意菜氹女 [壹週刊 - 1388] M1,阿人,李卓人,

阿人出力整意大利菜,方公就帶定白酒請大家飲,阿人仲話方公除咗係議會活字典外,如果要買酒都可以請教佢。(鄒潔珊攝)眾人諸事告別議會轉投熱廚房 阿人煮意菜氹女喺議會退下火線嘅工黨李卓人,原來轉頭就走咗入去熱廚房,講緊唔係佢加入政府,而係走入去真廚房,話嚟緊會多啲操練烹飪技術,搞多啲「阿人飯局」招呼好友。上星期三,阿人同佢嘅多年助理方約恆接受訪問之餘,仲請埋記者「食好西」,食佢親手整嘅意大利菜。佢話自己 ...


阿人出力整意大利菜,方公就帶定白酒請大家飲,阿人仲話方公除咗係議會活字典外,如果要買酒都可以請教佢。(鄒潔珊攝)

眾人諸事

告別議會轉投熱廚房 阿人煮意菜氹女

喺議會退下火線嘅工黨李卓人,原來轉頭就走咗入去熱廚房,講緊唔係佢加入政府,而係走入去真廚房,話嚟緊會多啲操練烹飪技術,搞多啲「阿人飯局」招呼好友。

上星期三,阿人同佢嘅多年助理方約恆接受訪問之餘,仲請埋記者「食好西」,食佢親手整嘅意大利菜。佢話自己十年前開始學烹飪,原意原來係為咗氹女,想個鍾意食意粉同意大利飯嘅愛女多啲返屋企陪兩老開餐,真係廿四孝老豆。

查實阿人似乎都幾有煮食天分,冇正式拜師學整意菜,佢就話自己喺街食過嘅嘢,就會返屋企自己試煮。今次佢就整咗個意大利沙律做頭盤,有八爪魚、火箭菜、甜椒、黑醋等,同佢議會生涯都有啲似,同樣甜酸苦辣齊晒;至於之後個南瓜湯,飲落又香又滑,記者食完頭盤同個湯都飽咗一半。

《壹》仔當日順便參觀吓佢屋企,個廚房門口仲貼咗「米芝蓮」揮春,記者問阿人係咪朋友所贈,佢就笑笑口話其實係佢叫朋友寫俾佢嘅,仲要求要畫三粒星上去,咁咪即係造馬?而最好笑係已經五十九歲嘅阿人,當日煮飯原來要戴老花眼鏡,不過佢一見記者鏡頭,就即刻除低收番埋。

阿人煮意菜,只係上半場,同場仲加映黨友何秀蘭露兩手,整咗個海南雞飯實行搞 fusion,《壹》仔見阿 Cyd先用湯浸熟隻雞,再用雞油嚟煮飯,雞肉煮得不知幾滑,不過調味醬汁不幸撻 Q。記者問方約恆對二人廚藝俾幾多分,身為打工仔嘅佢就答得好有技巧︰「你見我第一個食晒就知道啦。」

何秀蘭睇完 YouTube教學就去阿人屋企大顯身手,整海南雞飯睇得食得,係差個醬汁。(鄒潔珊攝)

為咗呢餐阿人飯局,阿人做訪問時不時行出行入,就係要細心睇火,睇吓呢隻八爪魚腳熟唔熟。(鄒潔珊攝)

呢張阿人戴老花眼鏡嘅相絕對值得珍藏,皆因佢一見鏡頭就即刻除低,而其實佢到咗呢個年紀,有老花又有咩咁出奇。(鄒潔珊攝)

之鋒毓民梁天琦 勢組宇宙最強幕僚團

新一屆立法會開鑼,議事堂內一代新人換舊人,樓上議辦就出現另一怪現象,就係會出現宇宙最強幕僚團,非建制派最少有三名幕僚或顧問,人氣肯定把炮過佢哋「老闆」。

立法會議員背後軍師一向身份低調,就算被喻為史上最強嘅「方公」,即李卓人嘅前議助方約恆,如果唔係選舉後同李卓人一齊喺台上痛哭,本身都冇人留意佢;但今屆立法會,他們受關注程度肯定大增,因為羅冠聰、梁頌恆同鄭松泰三個嘅幕僚或顧問,隨時先係記者嘅扑咪目標。呢三個議員背後嘅男人,大家絕對唔陌生,羅冠聰有黃之鋒做議助;梁頌恆就跨黨搵嚟「正選」梁天琦做顧問,而最爆應該係鄭松泰,議助會係黃毓民,毓民過去高質嘅發言,或者有機會「借屍還魂」喎。

幕僚係議員最強後盾,除咗要做資料搜集,打起拉布戰時更要捱更抵夜寫修正案,但亦因為咁,隨時比議員更熟悉某啲議題,可以左右佢哋老闆,但唔知會唔會變成垂簾聽政呢?

之鋒同羅冠聰打選戰時合作無間,但入到議會,關係隨時變賓主,會唔會影響合作?而擅長演說嘅之鋒,又會唔會幫阿聰寫多啲發言講稿呢?(黃智謙攝)

梁天琦近日講咗諗住進修唔會霸住個位做議助,雖然只用義務顧問形式幫梁頌恆,但到時佢嘅睇法,都可能左右青年新政團隊嘅政治方針。(胡智堅攝)

毓民遭滑鐵盧輸咗議席,好彩有個熱普城系鄭松泰殺咗入議會,毓民做佢助理,當然會令佢戰力暴增,但大前提係毓民肯「甘為『愚』子牛」。(鄭松泰 facebook圖片)

睇中楊岳橋人氣 公民黨惹狂蜂浪蝶

立法會選舉塵埃落定,新一屆議員呢個星期會宣誓正式上任,而政壇好戲依家亦先正式上演。據聞有部分新東泛民地區主任甚至區議員,睇中呢期公民黨氣勢如虹,尤其係同粉絲影相影到手軟嘅署理黨魁楊岳橋,於是有意轉投岳少旗下,呢班想「強勢加盟」嘅人腳,包括以前或而家嘅白鴿黨同新民主同盟中人,佢哋仲好識推薦自己嘅長處,話公民黨冇乜地區樁腳,佢哋加盟就可以補到位,仲講到公民黨有望成為泛民第一大黨,云云。

楊岳橋新東一戰,同張超雄、長毛同慢必「贏就一齊贏」,有忠又有義,但轉頭就爆出呢個講法,隨時令岳少由天堂跌落嚟,成為泛民眾矢之的,仲可能要背負「撬牆腳」呢個指控。岳少就回應話,喺兩次選舉之後,確係同某啲朋友認識深咗,可以加強合作,但入唔入黨就真係言之過早,皆因入黨唔係一個人嘅事,係成個黨嘅事,仲好謙咁話「政治一日都嫌長」,佢唔會因為依家公眾覺得佢受歡迎而沾沾自喜,只係希望泛民喺唔同位置都可以互相補位。

楊岳橋甚得街坊歡心,男女老幼通殺,據講連建制派嘅義工都特登搵岳少影相兼打咭,都咪話唔誇張。(楊岳橋 facebook圖片)

新東選民再次配票成功,推到五個泛民入局,其中公民黨楊岳橋(左二)經歷新東補選後,今次亦成為新東泛民票王,氣勢如虹。

撰文:巫不言

news@nextdigital.com.hk


鍾意就快D Share啦!