熱爆娛樂: 白食港視糧到 2018　陳錦鴻：使晒啲錢就做嘢！ [壹週刊

2016年10月20日星期四

白食港視糧到 2018　陳錦鴻：使晒啲錢就做嘢！ [壹週刊 - 1389] __,港視,陳錦鴻,M1,

食住「許文彪」個勢，陳錦鴻近日蒲頭開工。

娛樂偵訊

白食港視糧到 2018　陳錦鴻：使晒啲錢就做嘢！

大台深宵重播舊劇《創世紀》，令消失幕前近兩年，演奸角「許文彪」的陳錦鴻再度受關注。唔使撈，專心做湊仔公的他，原來仲係食緊已冚旗一年的港視糧。乾𢭃人工幾年，陳錦鴻好疏乎：「使晒啲錢就去做嘢！」

唔使做有糧出

《創世紀》中的「許文彪」奸到出汁，是陳錦鴻在大台十八年的代表作之一。劇集近日重播，令消失幕前近兩年的他回復人氣，更蒲頭接拍港台劇《人間有情》。

可以放軟手腳，只因陳錦鴻至今仍食住港視糧。一四年由大台跳槽去港視，他簽下四年賣身契；點知轉會不久，港視就因不獲發牌而胎死腹中。結果，陳錦鴻只為港視拍了一套《末日+5》，跟住每個月印印腳，乾𢭃港視人工，直至二○一八年初。

唔使點做都有收入，陳錦鴻四年時間專心照顧患有自閉的九歲兒子。

近期重播《創世紀》，陳錦鴻演的奸角「許文彪」，好到肉，網民 like爆。

明年中搵工

有冚旗港視養住，陳錦鴻同老婆杜雯惠每週為港台開咪一日，主持節目《傾心事家庭》賺外快，其餘時間做湊仔公，專心照顧患有自閉症、現年九歲的兒子 Edgar。

最近為港台劇開工的陳錦鴻，自言不急於回巢大台，因為他可以拖到明年中才搵工。

「我同港視嘅約仲有一段時間，人哋（大台）未搵我，我亦未積極去搵佢。等到明年中，我就會積極搵工；咁耐冇做嘢，邊個搵我都𦧲飯應使晒啲錢就要去做嘢啦，哈哈！」陳錦鴻說。

最近他為港台劇《人間有情》埋位開工，做番忠角，冇晒「許文彪」味。

99年，大台開拍《創世紀》陣容強勁，除羅家良、陳錦鴻、郭晉安加古天樂，仲搵嚟吳奇隆做外將。

港視都冚旗一年，但陳錦鴻因簽下合約，至今仲有兩年糧可以乾𢭃。

跳槽到港視，陳錦鴻只拍咗一部《末日+5》，就唔使開工。

囝囝無師自通

為咗患有自閉的兒子，陳錦鴻曾經停工，照顧兒子直至他衝破自閉限制，並成功入讀主流學校及考得全班第一名。

有份糧咬到一八年，陳錦鴻決定將這段「唔使撈」的自由時間，全撥給囝囝。

「個仔最近鍾意玩音樂，打鼓、結他，但唔係跟老師上堂，隨佢鍾意，自彈自唱，我就陪佢一齊亂咁唱。如果佢對某種樂器有興趣，我都會陪佢一齊學。」陳錦鴻說。