15/10 9:00pm
尼泊爾機場
娛頭
尼泊爾直擊 分手半年 攀賭王千金得米 方力申何超蓮拍拖三個月
今年三月，方力申跟鄧麗欣宣布結束十年情，男方揚言曾努力箍煲求復合，亦多次淚灑人前，不過 Stephy表示自己的世界裡沒有童話，求去心意堅決。
分手唔夠半年， 36歲的小方已經攀上另一個世界，極速撻着細他十一年的賭王三房千金何超蓮。七月中，二人在好友 G.E.M.刻意扯線下，開始拍拖。
做了多年「點滴是生命」活動大使的小方，上週更孖住女友何超蓮飛尼泊爾山區做義工，朝夕相對，遠在他方戒心低，小方在機場對女友掃背、摸頸，仲一支水兩份飲，得米！
前後腳到
今個月七號，方力申跟「點滴是生命」另一位大使、女飛魚歐鎧淳一同出發到尼泊爾山區探訪，上機前，他還在 ig放了二人在機場合照。過往，小方亦試過孭住前度 Stephy上山做善事，但今年的女主角卻換上另一人，除了歐鎧淳，還有跟他前後腳飛去當地的何超蓮。
「小方跟《點滴》創辦人 Jackie合作咗一段長時間，之前三年，佢都提出搵埋 Stephy一齊做呢個活動，大家都好 friend，今年叫埋超蓮，亦係小方意思。不過成個行程最主要係起學校嗰 part，歐鎧淳做完十一號飛走，超蓮就十一號先由香港飛過去；佢哋喺喜馬拉雅山腳附近探訪貧民區，係額外加插嘅活動。」知情者說。
超蓮第一次
據了解，早已經答應出席香港舉辦首屆 Formula E賽事做嘉賓的何超蓮，並未有等整個比賽結束，已急不及待飛去尼泊爾會合小方。
以往出埠不是歐洲便是日本，超蓮為小方獻出尼泊爾第一次，更預先搵定朋友同行，不過朋友 Stephanie臨時有事要提早走人，但有男友全程傍住，就算在落後山區五日四夜瞓睡袋，何家千金亦十分 happy，甚至郁手跟當地人一起煮嘢食。
匿埋傾偈
十五號晚，二人做完義工隨大隊啟程返港，小方跟何超蓮幾乎形影不離，排隊等候安檢時，小方不避嫌細心打開水樽蓋遞給女友，更一支水，兩份飲。
之後，小方更忍唔住同女友有身體接觸，掃背摸頸，又扮 cute氹開心；二人更一度離隊五分鐘，匿埋一角，對住手機睇相傾偈。
翌日清晨五點，大隊返抵香港機場，小方幫戴住黑超的超蓮從行李帶攞起行李後，即有默契地愈行愈遠，各自推住行李車分頭離開。
夜店攬埋
「 G.E.M.有心撮合佢哋，一直安排聚會。八月中 G.E.M.生日時，小方同超蓮已經喺埋一齊，到九月李蘊囡囡擺百日宴，兩個亦係坐埋一齊有傾有講，嗰晚人多，小方成晚都傍住超蓮，好 sweet。」知情者說。
啱啱打得火熱，但去到公眾地方例如夜店，亦必定嗌埋成班朋友做掩護。
「出街多數係一班人，有晚去銅鑼灣耀華街私竇飲嘢，兩個最初都玩得好小心，但飲多幾杯就冇晒戒心，愈坐愈埋，最後竟然扭埋一嚿，好似脆麻花咁；當時好多人睇到都覺得愕然，因為大家以為小方對 Stephy仲未忘情，冇諗過咁快搵到第二個拍拖。」
立即升呢
日前何超蓮出席活動時，便公開讚「小方對個個女仔都咁好」。
「小方喺港大畢業，又曾經係香港泳隊代表，爹哋開畫廊，細佬係律師，家境都有番咁上下，但同超蓮拍拖，都真係升晒呢！今次超蓮紆尊降貴，跟佢去山區咁辛苦都肯，可見佢哋係互冧，小方梗係開心啦。」知情者說。
愛星星的超蓮
被喻為全港至索千金的何超蓮，拍拖對象似乎都離唔開……星！ 11年與台灣藝人吳克羣拍拖，超蓮為愛經常飛到台灣交人，有傳因難抵男方脾氣暴躁，終在去年底斬纜。
跟吳克羣四年情玩完，重新上市的超蓮成搶手貨，包括本地富二代，霍英東長房孫霍啟山，內地富商劉志強之子劉根森，及中國星老闆向華強兒子向佐。其中霍啟山攻勢最猛烈，由香港追到去台灣，陪食牛肉麵。
不過一眾兵團都敵不過曾經吸毒的偶像帥哥柯震東，今年四月，超蓮被影到跟柯震東在台北唱 K，等電梯期間，男的一手將超蓮擁入懷，相當親暱。
超蓮揀男友，家底其次，有星的光環才是首選。
賭王女婿門檻
有開畫廊的父蔭，出道前的方力申已家住千萬碧瑤灣。 07年，小方個人以千多萬買入貝沙灣，家境背景都算「靚仔」，同何家級數雖有大段距離，但已達到做賭王女婿最基本門檻。
易得手
有米有樣有學歷，方力申一直被視為娛圈藍籌之一，食女無論明暗，都冇難度。
李彩華拍劇撻着
與同公司的李彩華拍網劇《百份百感覺》傳出緋聞，女方更戴住被指是方力申送給她的頸巾出席活動。不過兩人緋聞曇花一現，快來快去。
模 Rainbow爆抄牌
09年，方力申主持節目《美女廚房》，被「美少女廚神」的參賽者 Rainbow（胡心諾）爆他背住女友 Stephy，向她發動短訊攻勢。事後小方反指 Rainbow主動抄佢牌，借他出位，劃清界線。
鄧麗欣拖拉十年
06年與 Stephy（鄧麗欣）拍《獨家試愛》正式撻着，二人一直不認戀情，至 10年，傳媒發現 Stephy與方力申一家同遊北京，雙方才進一步默認。有指小方一直覺得屋邨出身的 Stephy並非自己的最終結婚對象， Stephy亦心知男友不專一，拖拉十年，終在今年初，拍拖十周年發分手聲明，畫上句號。
撞樣再撞仔
阿嬌（鍾欣桐）與超蓮都是眼大鼻高臉尖尖，就連超蓮自己都講過，同阿嬌似親生姊妹，因此被稱「翻版阿嬌」。兩人除了撞樣，私底下勁老友，超蓮更是 Twins的鐵粉。超蓮生日，阿嬌會被邀請出席派對，呢對好姊妹，竟然連瘟仔口味都相同，飲埋一杯茶。
今年 3月兩人發聲明宣布分手後，現身活動的 Stephy強忍淚水，而方力申就傷到流男兒淚，不過轉個頭已經有新歡。
山中情
方力申拍拖唔公開，唯一承認的 Stephy，亦要苦等四年，冚無可冚下才獲男友默認關係。
知都唔俾你見！方力申除外遊拍拖，更有一絕招，同女友上山，夠浪漫又低調。
03年 2月，與暗交兩年的阿嬌鍾欣桐飛瑞士上雪山，返港後雖高度戒備前後腳出閘，但仍被傳媒撞破，「申嬌戀」見光。
但跟方力申上山最多，當然是拍拖十年的 Stephy，她多次陪男友為《點滴是生命》到外地山區探訪，拍住拖做義工。 13年兩人同遊印度，在喜馬拉雅山上睇日出。
今年初，二人公布分手前的三個月，方力申曾在 ig上載與 Stephy於喜瑪拉雅山的拖手相求箍煲。由宅男女神 Stephy，到高攀賭王千金何超蓮，方力申的溝女境界，同行山一樣，壇數愈來愈高。
撰文、攝影、攝錄：娛樂組
|
鍾意就快D Share啦！
|
|
|
