【短片】【內鬼已捉】爆料指開門利是得$3,800 張名雅宣佈：知道係邊個講
2016-09-30 22:55:00 HKT
攝影:陳順禎
邊個XX邊個就係鬼！你懂的。
呢度有冇「鬼」
結婚原是喜事，點知爆出開門利是風波。
陳庭欣話，今朝「上頭」(即張名雅)宣佈咗，鬼已捉。
明明係一件喜事，但傳下傳下，就變成是非……唔……
事主係啱啱成為人妻嘅張名雅，因為好姊妹陳庭欣一次唔小心，爆咗佢同律師男友蔡錦豪嘅婚訊。結婚當日，陳庭欣同唐貝詩、何傲兒等人齊齊做姊妹，當日大家開開心心，點知新婚燕爾期間，竟有人向傳媒吹水，話開門利是得$3,800。
撇除兩位新人，有機會放料嘅，最大可能係張名雅陪嫁嘅9位姊妹，平時同傳媒有接觸嘅藝人機會最大，包括：唐貝詩、何傲兒、譚凱琪、陳庭欣、節目主持李靄璣同動作演員何佩珉。
今日《蘋果》獨家爆料，原來一對新人結婚前，張名雅早將兄弟姊妹團加入WhatsApp group chat，方便傾婚禮細節。日前新聞一出，一眾兄弟姊妹即喺WhatsApp中，抽絲剝繭討論「捉鬼」，更已鎖定目標。(新聞連結: http://bit.ly/2dcbMbf )
咁啱當日唔小心爆咗張名雅婚訊兼係送嫁姊妹之一嘅陳庭欣，今日到釜鑽石山荷里活廣場出席美食節，對於「捉鬼」之說，陳庭欣早有備而來，佢話:「其實喺gp裡面冇咩話點討論，因為唔係事實(指開門利是得$3,800)。」但講到話一眾姊妹團依家都成為「容疑人」，陳庭欣無奈稱:「今朝收到上頭(即張名雅)最新消息，話知道邊個係內鬼喇，講咗幾句之後，佢講咗句『有緣再聚』，就刪咗個gp喇。其實Carat都覺得結婚係一件開心事，(可有問內鬼係邊個？)冇問呀，佢都唔喺香港，依家問好似好八咁。」
再問陳庭欣可有猜測到底邊個係「鬼」，佢就話:「唔知喎，總之我知道一定唔係自己，其他嘅嘢就唔想去猜測喇。就算真係有呢個人，我相信佢都唔係有心咁樣講嘅，亦都唔係講事實嘅全部。」
|
鍾意就快D Share啦！
|
|
|