莊思敏簽約畀蕭定一約4年，舊年初仲大肆搞續約記者會，活動有莊思敏首次曝光以手臂遮着胸前兩點嘅全裸相，性感程度直迫當年莫文蔚嘅光頭全裸造型唱片封面相。莊思敏當日選擇加盟蕭定一希望拍多啲電影，可是呢幾年過檔發展未如理想，加上好多美容活動，大部份係廣告商接洽佢，然後莊思敏再「彈」畀公司跟進，有指佢深感貨不對辦，所以提早解約，佢噚晚喺韓國出席完活動後po相喺Instagram分享時，同時留言公告完約：「很高興能夠成功首位香港藝人代言韓國精華素，藉着這個有意義的日子，我也宣告一下，我跟中國3D數碼經理人公司合約完成了，對呀，我現在是自由身呀。」 舊年年頭，莊思敏喺續約記者會中，即場播放咗一段短片，內容提及佢剛入行時同當時經理人鬧不快，對方唔單止佢投閒置散，只安排陪客食飯，莊思敏有話：「係不愉快嘅合作經歷，我亦都唔介意前經理人會睇。」估唔到同蕭定一續約一年多，佢又要離開，呢幾年發展，據知對公司未有為佢度身訂造開戲有微言，其實莊思敏也曾因電影《導火新聞線》同王宗堯嗌交，兩人更曾隔空罵戰，事後兩人都被蕭定一「照肺」。《蘋果》今日打畀莊思敏，對於提早解約一事，佢話：「今年唔知係咪因犯太歲關係，發生咗好多嘢，有啲穩定工作如《姊妹淘》同dbc數碼電台工作冇咗，但開心係拍多咗劇，唔知係咪運驅使要變動，我同舊經理人公司束合作關係，我會嘗試啲新嘢。我哋都合作咗4年，想試吓去第二度發展。」就簽約後「貨不對辦」傳聞，莊思敏避談：「完咗約，唔講了，我係開心離開。」至於蕭定一就回應：「提早開心和平解約。」佢話日後大家仲有合作機會。
|
鍾意就快D Share啦！
|
|
|
