依家人人講求健康生活，多做運動，鍛鍊肌肉，造出完美身段梗係人人讚好不過，正如公仔書都有講：「凡事太盡、緣份勢必早盡！」如果你玩健身玩到過晒火，為咗練大舊肌肉乜都唔理，最後真係出事呀！
喺巴西聖保羅有個健身狂人近日接受傳媒訪問，大爆自己5年間由一個吸毒道友排骨精，極速變身肌肉狂人嘅故事。本來聽落幾勵志，不過呢個名叫施加圖嘅48歲大叔，自從5年前跟住老友走入健身室，決心擺脫排骨仔外型後，就踏上不歸路。
話說佢初初做運動當然係好事，不過之後佢愈練愈沉迷，操到渾身肌肉都仲覺得唔夠，先係幫個手瓜、肩膊同胸口注射如類固醇等禁藥，其後甚至會為咗令肌肉好睇，會注射油入去。據聞佢手瓜增長咗兩倍去到60cm都仲覺唔夠，體重增加咗25公斤，都仲話樣樣要再勁啲。施加圖話每次照鏡都覺得自己好掂，仲話希望可以倚靠自己個超級Body開創自己嘅事業。
對於喺聖保羅街頭，有人叫佢做「變型俠醫」、「阿諾舒華辛力加」同「He-Man」，佢話不知幾過癮喎。之但係，其實佢以前都試過因為過量注射藥物，搞到入醫院，再搞落去，真係會隨時命仔不保喎！
SO東波同你追實體壇每個精彩時刻！
http://on.fb.me/1PWMCFH
來源 source: http://hk.on.cc
|
鍾意就快D Share啦！
|
|
|
