現年63歲的「靚聲王」張偉文（Donald）近年受腰患及腳痛纏擾，要坐輪椅代步。Donald今日為10月中開始舉行的個唱進行綵排，雖然他外形消瘦，但精神尚算飽滿。受訪時，他透露11月完騷後會做腰椎大手術，雖然手術費用高達50萬港元，但為了重獲行路的機會，他實行賣唱籌錢，更直言不介意傾家蕩產做手術！
八成機會行得番
Donald透露醫生表示手術後有八成機會可以再次行路，他滿懷希望表示：「會切尾龍骨最底下嚿骨，然後喺嗰個位補番適合size嘅假骨，而第二嚿骨都有少少初期退化，所以要用骨漿補番，再整個類似烏龜嘅罩鞏固啲骨。」他亦自爆為了慳六萬元，上年找了另一個醫生做手術，但卻不太成功，故今年找回原裝設計此項手術的醫生做手術，他謂：「估唔到佢仲肯幫番我，仲叫我申請個資助，因為我唔係好紅，唔想做完手術就冇晒錢，如果申請成功咁我做手術就唔使錢，不過如果申請唔成功，我傾家蕩產都會做！因為有八成機會行得番，我行唔到路好耐，所以好鼓舞！」
手術費最少要50萬
問到手術需要多少錢？他透露因手術需要四個醫生，故單是醫生費用都已經逾30萬：「仲未計住院費，冇50萬都唔使諗。（怕唔怕手術有風險？）一個人都唔知幾時會離開呢個世界，總之值得做，有個希望喺度。」他亦透露因為此手術非微創，故手術後要住院兩星期休息，之後再用三星期訓練行路。
感激歌迷支持
講到今次要開五場演唱會，Donald表示身體應付到，屆時坐着開騷的他亦謂騷前要打定止痛針，因為腰至膝頭神經會痛。對於有指此是告別作，他謂：「唔係，希望有得做落去。（你之前唔肯收歌酬？）係呀，之前驚有啲乜嘢，但啲錢又喺我戶口度，所以先話想唱一場收一場，但依家公司畀咗訂我先，畀啲鼓勵我。」談到很多歌迷朋友很支持他，他開心表示：「真係好多謝佢哋，有歌迷話就算我瞓喺度都會嚟聽，所以好欣慰同受寵若驚，呢啲觀眾緣好難求。」
|
鍾意就快D Share啦！
|
|
|
