掃呢頁CODE去手機

2016年10月22日 星期六

__,

任天堂昨晚終於發表新主機,傳聞中嘅NX代號主機,真身其實係結合家用機同手提機嘅「NintendoSwitch」。不過得罪講句,今次任天堂發表嘅NintendoSwitch,我係有少少失望,不過只係失望咗一陣。事關Switch似係WiiUremote加強版,強化家用機同手提機二合一概念,將可拆嘅手掣加喺一部平板主機上帶出街玩,喺屋企就可以放返落底座接駁大屏幕。聽落好似唔錯,幾時都玩得,但類似玩法唔係 ...


任天堂昨晚終於發表新主機,傳聞中嘅NX代號主機,真身其實係結合家用機同手提機嘅「Nintendo Switch」。不過得罪講句,今次任天堂發表嘅Nintendo Switch,我係有少少失望,不過只係失望咗一陣。

事關Switch似係Wii U remote加強版,強化家用機同手提機二合一概念,將可拆嘅手掣加喺一部平板主機上帶出街玩,喺屋企就可以放返落底座接駁大屏幕。聽落好似唔錯,幾時都玩得,但類似玩法唔係新,而且Switch亦冇咗任天堂嘅感覺。見到黑色機身同手掣設計,甚至令我覺得有少少Nvidia Shield影子,點知搵料再望真啲,發現機身同之前流出(之前報導過)嘅專利設計一樣之餘,原來Nvidia真係協力開發。

雖然任天堂目前仍未公布Switch規格,但Nvidia已搶先話Switch用咗Tegra處理器,架構同頂班GeForce卡接近,將來要對應VR都唔係冇可能。估計Switch屏幕應該有8",而主機兩邊有分體式無線手掣「Joy-Con」,可以一對手掣分開兩個人用方便雙打。再留意返影片入面嘅機身細節,可以見到插卡位唔似用SD卡,應該係用返3DS類嘅專用卡。

今次喺宣傳片一共見到6隻遊戲,除已知嘅《The Legend of Zelda》《The Elder Scrolls 5: Skyrim》同《Mario Kart 8》幾款大作之外,仲有一隻NBA、Mario新作,同埋疑似《Splatoon》嘅作品,而且仲用佢嚟sell多機連線對戰,想踩埋入電競市場。似乎任天堂對Switch期望唔細,加上好多大廠都同撐Switch,起碼唔使再好似Wii U咁食自己,一定多嘢玩,所以我見大部份外國玩家都睇好Switch。

雖然硬件同概念上Switch唔算驚喜,但將來可以利用遊戲性發揮出機能優勢,仍然係值得期待嘅。最後容我吹多幾句,個人覺得今日嘅任天堂已經唔同咗,我唔敢講係壞事,但見佢積極同第三方合作,令人睇到前景係開心嘅。再以今次同Nvidia合作為例,如果Switch真係行到VR,分分鐘呢個先係食糊位。點解?部機有咁勁嘅影像處理兼係portable,對應體感之餘,一對無線Joy-Con可以話係為玩VR而設添。我相信任天堂唔會得咁多,一定係做緊一手好牌,所以我嘅FF又令自己對Switch有返期待。新主機暫定2017年3月推出,售價待定,請大家拭目以待。




來源 source: http://menclub.hk
鍾意就快D Share啦!