今年45歲黎姿出身演藝世家，爺爺係香港電影之父黎民偉，嫲嫲係香港第一代電影明星林楚楚，姑媽係甘草演員黎萱。黎姿14歲就俾姑媽黎萱帶入行，縱使出身演藝世家，但黎姿童年時期並不富裕，爸爸患有腦膜炎失聰，之後家道中落，全家由2000呎何文田豪宅搬到200呎嘅九龍城東頭邨住。入行後嘅黎姿，憑標致五官，得到黃百鳴賞識，自此展開長達20年嘅演藝生涯，成為三棲藝人。電影方面，黎姿初期都只係做吓花瓶角色，到96年喺《古惑仔之人在江湖》做黐脷根細粒粒而彈起。到04年，黎姿再憑《金枝慾孽》嘅侯佳‧玉瑩，奪得無綫視后寶座，演藝事業爬上頂峰。曾經講過自己細個冇乜機會讀書嘅黎姿，一直疼錫細佬黎嬰，有指佢將自己拍戲積蓄供細佬去外國讀書。但當05年細佬學成歸來，喺銅鑼灣開設皮膚護理中心躊躇滿志之際，黎嬰卻喺一次交通意外中，嚴重受傷，有指期間動過10幾次開腦手術。黎姿當時大受打擊，有傳要四出籌錢醫細佬，為咗令細佬康復，除咗返教會望神蹟出現，更安排黎嬰入住月租達10萬蚊嘅復康院。喺黎姿細佬車禍入院後，馬廷強喺黎姿身邊給予無限量嘅支持，替黎姿渡過難關，最後細佬康復出院，令黎姿感動不已，當時已經認定馬廷強係可以付託終身嘅男人。黎姿最終喺08年宣佈退出娛圈，嫁俾大自己15年嘅馬廷強，二人婚後育有3位千金，而淡泊名利嘅黎姿，亦樂做全職媽咪，喺屋企專心照顧老公同湊女。
來源 source: http://s.nextmedia.com
|
鍾意就快D Share啦！
|
|
|
