為確保服務質素，所有在 Lazy上註冊的家務助理，都要修畢僱員再培訓局的相關訓練課程。
壹起創
懶……到要創業
懶，可以令人一事無成，如果是年輕一輩，更加會被標籤為不折不扣的廢青，不過世事好玩之處，正是有無盡變化，如果個個結局都一樣，又點會世事如棋局局新？
一位三十前，正因為懶，連屋都懶得執，垃圾雜物堆積如山，結果反而諗出計謀，無做廢青，仲走上創業之路，實行做．老．闆。
蟲蟲出沒
年輕人，總想有屬於自己的空間， 27歲的 Kelvin亦不例外，自己租劏房住，話就話有私人空間，不過地方細，加上懶得執屋，結果變成「雜物山」，「衫褲鞋襪加食物，甚至連垃圾都有，點知有一日，竟然見到有蟲蟲爬來爬去，先覺得大件事，於是就諗起想搵人幫手執屋。」雖然坊間已有不少家務助理服務，不過 Kelvin就認為，人人都有手機，如果用手機搵家務助理，會方便好多，於是想出「 Lazy」手機應用程式，用法類似 Uber，一面接受登記成為 app內註冊家務助理，另一方面可讓用家落單，提供預約上門家居清潔服務。
迎面冷水
有人話過，創業成功的第一步，是創辦人要有切身需要， Kelvin正是最佳示範，不過，動機良好，但實行時就出現不少難題，皆因 Kelvin原本任職電子產品銷售經理，寫 app可說一竅不通，「將想法同身邊朋友講，點知一盆冷水照頭淋，話有份工就好好做，咪搞啦，後來識到 Daniel，兩人一拍即合，於是逐步將諗法變成真實，例如落單流程、填資料項目、派傳單步驟等等。」一個月之後，已經寫好個 app，兩人再用兩個月進行測試，終於在上年底正式推出。
走出谷底
雖然好快就寫好個 app，不過 Lazy的營運模式說到底都要「靠人」，既要有家務助理，亦都要有足夠的客人落單，而且為保障質素，所有註冊的家務助理，都要修畢僱員再培訓局的相關訓練課程，所以，最初 Kelvin找來家務助理公司幫手，「開始時有 20位家務助理註冊，但第一個月一個客都無，最後只剩下幾位家務助理。」為求增加知名度， Kelvin試過派傳單，「派足三日，只得一個客。」路不轉，人轉，於是 Lazy跟團購合作兼擺街站， Kelvin更定期到僱員再培訓局，招攬剛畢業的家務助理，終於將生意推上軌道，現時每月平均有近三千張單，有過千名註冊家務助理，兩個月前更達到收支平衡，「今個月更會加強服務，加入上門按摩、託管、寵物看管及滅蟲等等。」原來懶，都有出路，又有乜好怕喎。
撰文：劉耀祥
攝影＆攝錄：廖健昌
ed_bn@nextdigital.com.hk
|
鍾意就快D Share啦！
|
|
|
