張頴康繼續慳家，成為大紅人嘅佢都係去酒樓食個羊腩煲。
一句我等咗16年喇！剛剛在舉行完嘅《TVB馬來西亞星光薈萃頒獎典禮2016》勇奪飛躍進步男藝人獎嘅張頴康，尋日凱旋返港，老婆麥雅緻與囡囡去機場接機後，一家三口去咗慶祝，張頴康雖然成為近期大紅人，但冇因為咁而變得大使，貫徹佢慳家性格去咗平民酒樓食個最愛嘅羊腩煲慶祝。
不過當中最令人感動嘅係，原來麥雅緻係唔食羊㗎！只係喺度純粹「陪坐」，呢個老婆好到加零一，唔單止鼓勵老公去追夢，連食嘢都遷就埋老公，張頴康喺社交網上多謝大家對佢嘅支持外，仲希望大家都愛屋及烏，支持佢一家人：「2016年11月26日，終於攞倒（到）我人生第一個獎，心情真係好激動！番（返）到香港，第一時間去整番個羊腩煲，簡簡單單咁慶祝吓！（其實我老婆係唔食羊嘅，佢只係陪我！仲有，大家唔駛（使）懷疑我收埋咗支酒，只係影相嗰陣支酒未到啫！）呢兩日，我見倒（到）好多嘅留言同埋祝賀，雖然我未能夠一一回覆，唔好意思，但係，真心講，我全部都收倒（到）哂（晒），我感覺好窩心，我完全感受到大家對我嘅支持、愛護同埋鼓勵！我想多謝大家一直以嚟除咗支持我之外，亦都愛屋及烏，支持哂（晒）我哋一家人！好多謝你哋！開心咗兩日，聽日開始我又會重新出發，繼續努力，盡全力做好我每一個角色，照顧好我嘅家庭！」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
來源 source: http://hk.on.cc
|
鍾意就快D Share啦！
|
|
|