歌手陳柏宇（Jason）在九展舉行一連三場演唱會的尾場演出，騷後舉行慶功宴，並獲女友符曉薇獻吻。受訪時問到下次開騷可是想登上紅館？他謂：「冇呢個目標，對我嚟講邊個場地開騷都係咁落力，唔係個地方證明付出幾多。」講到他今次開三場騷是否仍未夠喉？他笑言：「夠啦。（把聲唱到拆拆地？）係啦，今日真係冇留力，後面嗰啲歌都要焗嗌。」講到他食住薯片來到慶功會場，他笑言：「成個月冇食過薯片，係慶功薯片，嚟緊都會放幾日假休息。」
講到在台上感觸落淚，Jason謂自己並非不易喊的人，但謂自己的哭點與別不同：「同女朋友比，佢係傷感而喊，而我係感動而喊。」講到許志安擔任嘉賓，他自爆親筆寫信邀請對方來：「因為我中文差，所以封信愈寫愈潦，寫咗四頁紙，其實好難寫，而且係要求對方嚟做嘉賓。（點解唔打電話而要寫信？）我冇佢電話，我係托個舊同事幫手。（咁佢寫番信覆你？）佢托個舊同事答覆。」
至於講到曾有人叫他轉公司，Jason坦言曾有兩、三間公司接觸過佢：「都係嗰幾間主要嘅唱片公司。（你有冇心郁郁？）冇，因為未去到有咩要傾之前，口頭上睇下有冇興趣時我已經落左閘，所以唔會去到下一步。（點解唔轉？）因為我花咗好多時間同佢哋由同事變做朋友，唔想冇咗呢段友誼，我做呢份工係生活一部分，我想生活可以開心滿足，而我滿足嘅方法就係同到鍾意嘅人一齊做嘢，唔係唔完全計較錢，但係足夠嘅。（同依家公司仲有幾耐約？）仲有好幾年。（之後會繼續續約？）會，除非我唔做呢行為止，如果有一日我唔做，但出番嚟我都係想簽番呢間公司。（咁長情？）係，飲水思源嘛，同埋我哋努力做呢件事，我嘅成果係應該同佢哋一齊分享。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
