娛樂偵訊
孫耀威開鋪 性感 Macy陪飛單車
曾經在香港及上海開設酒吧蝕了過千萬，仍無阻孫耀威從商壯志，近日更將資金回流香港，在美麗華酒店開設兩間時尚西裝鋪，為生意瞓身的他，除擔任設計，更為自家品牌做 model，為求 fit爆 sell西裝， Eric用了三個月狂操瘦了 16磅；開張在即，日前 Eric就有著住性感 bra top運動裝的 Macy，陪住在青龍頭踩單車練氣，二人在馬路飛馳， Eric更緊張在旁監察馬路車輛護住女友前進。
勁減十六磅
孫耀威投資過千萬開鋪，推出自家西裝品牌 TUXEE，除了擔任首席 designer， Eric更親任品牌代言人。向來鍾意食好西的 Eric，近年身形大隻不少，為了有更佳線條做 model， Eric下定決心減磅，三個月就瘦了十六磅。
「佢好鍾意食嘢，近年身形比以前大件頭，但佢要做好一樣嘢會好堅持，始終生意投資咁大！ Eric真係好用心機，佢仲會做埋 model，幫鋪頭拍 MV宣傳，為咗做生招牌，佢好努力減肥，做好多運動，又跟營養師餐單食嘢！」 Eric身邊人說。
無花無假，日前，本刊就發現 Eric晨早同女友 Macy，拍拖在青龍頭踩單車操 fit，無見一排， Eric果然 fit爆，難得退出多時的 Macy，著住 bra top運動上衣，身材亦無走樣。兩人一人一部單車在馬路來回踩，嬌滴滴的 Macy，好明顯較新手，唔及 Eric連單車都係專業單車手級數，由於在馬路飛馳， Eric亦緊張照顧女友，專登讓 Macy踩在內線，自己在外圍監察車輛經過，相當體貼。
女友揸數
踩了大半小時， Eric似乎意猶未盡，同 Macy再行落碼頭練跑， Eric更變埋教練，教女友用提高腿方式跑步，鍛鍊大腿肌肉，其間，兩人又行近海邊睇人釣魚，見幾個女人釣到兩條釘公魚， Eric同 Macy竟然雀躍借來當道具自拍，十分搞笑！
翌日，兩人又秤不離鉈，一同回到位於美麗華酒店的鋪頭打點，見男友整理大堆西裝， Macy亦不停俾意見， Macy又攞出大疊文件對貨，據知，同孫耀威拍拖七年的 Macy，鋪頭一切營運都由她負責管數。
薛世恒幫拖
今次投資千萬開鋪，店內的西裝款式亦有別一般傳統，布料設計亦大膽創新，未開張已有唔少 artists支持， Eric好友薛世恒更為品牌做 model。「鋪頭未開張，好多人收到風嚟幫襯，呢個月已經唔使蝕錢！」 Eric興奮地說。
離開時，記者問 Eric係咪狂操為鋪頭做生招牌， Eric表示鋪頭籌備經年。「為咗線條好睇啲，都專登 keep fit，有兩個月跟營養師準備嘅三餐食嘢，食得好清淡！」
提到是否為鋪頭瞓身？「都係呢段時間，遲啲會拍番戲，應該交俾 Macy搞！」
女友咁幫得手， Eric當然放心晒
退出幕前
現年僅三十五歲的陳美詩（ Macy），模特兒出身， 04年在經理人李進發掘下入行做歌手，並與梁靖琪、廖雋嘉、張曼伶組成四人組合「女生宿舍」， 07年， Macy加入無綫曾擔任無綫娛樂新聞台主持，及拍過劇集，如《萬凰之王》、《回到三國》、《女警愛作戰》等，但大多演綠葉角色； 13年， Macy約滿離巢無綫，並決心退出幕前，全職做孫耀威背後的女人，照顧男友為樂。
撰文、攝影、攝錄：娛樂組
|
鍾意就快D Share啦！
|
|
|
