恭喜晒!「強強 (Joshua) 由朋友變成我男朋友，而到今日，成為我未婚夫！」32歲處女黨成員岑麗香，今午四點左右，於IG宣布，佢真係要嫁喇！「我好感恩終於可以同大家宣佈，上帝畀我搵到我嘅Mr.Right喇！多年前我哋喺溫哥華因為工作關係而認識，但自此並冇聯繫⋯估唔到多年之後，喺朋友嘅介紹下，我哋再次遇上⋯強強 (Joshua) 由朋友變成我男朋友，而到今日，成為我未婚夫！」「能夠同自己嘅心靈伴侶結婚，係一種幸福，我哋好期待踏上人生另一個階段，可以一同經歷神一齊成長。感謝我嘅家人、朋友、弟兄姊妹、同事一路幫我哋保持低調同保守秘密，多謝觀眾同粉絲朋友們一直嘅支持同祝福！感謝傳媒朋友一路以來對我嘅關心同鼓勵，拍拖之後你哋都好照顧強強。」「大日子快到了，宜家忙於準備，請體諒我未必可以完全回覆到大家。好感謝大家！你們的祝福我哋完全收到晒！ 主祝福你哋！」香香同強強拍拖一年半，去年由《蘋果》獨家率先踢爆喜訊，話咁快兩人感情已經進入大直路，上年年尾強強向香香求婚，女神爽快答應，前日有報道指香香已向無綫申請放大假、飛返溫哥華，同男友強強籌備婚禮（新聞連結： http://bit.ly/2gfwCTx ）婚禮應於本月初舉行，香香只會請最close嘅親友觀禮，所以佢嘅朋友同家人已經陸續收到請柬。不過香香同強強都係鬼仔鬼妹性格，只會簡單簽紙行禮，未有打算將婚禮大搞。
|
鍾意就快D Share啦！
|
|
|