聖誕節好多人都會唱呢首歌：「Oh...聖誕節托它歸家...」但唱嘅時候心情一啲都唔愉悅，因為唱完之後又要過一個Lonely Christmas，嗰一刻真係好想將個「它」改成「她」或「他」，而喺呢個有人歡喜有人愁嘅日子，See See TVB Facebook專頁就上載咗一條名為「福利女神社」嘅片段，成條片由女神陳瀅（Jeannie）扮演絕世體貼好女友，為大家聖誕節送暖，但有單身網民就好憤怒，話咁樣唔係送暖，而係雪上加霜！
請你食糖
無論送暖定雪上加霜都好啦，Jeannie喺呢條片度使出「五大絕招」做體貼女友，已經成功俘虜咗一班宅男嘅心！首先第一招「送心心糖」，當男友工作遇到挫折時，唔係安慰佢咁簡單，而係好sweet咁整心心手勢，再加個甜笑話：「唔好唔開心啦，請你食番粒糖啦。」嘩，網民話食完粒糖之後，會有糖尿病喎！
陪打機勁屈機
咁都未夠，第二招就係「投其所好，有機一齊打」，好多女仔都唔鍾意男朋友成日掛住打機唔陪自己，不過Jeannie就好高招，同埋男朋友一齊打，咁就可以黐住佢之餘，又可以多個話題同男友傾，難怪網民都話：「我只想找一個肯陪我打機的女友！」
第三招係「蜜運中仍會留給雙方私人時間」，片段中嘅 Jeannie會自己約朋友去街，咁就可以有自己生活，男友又可以抖吓氣啦，緊接就使出第四招「無微不至的關懷，是最好的治病良藥」，男朋友仔唔舒服，Jeannie個樣好愁，仲係咁問有冇事呀？有個女友咁緊張自己，係男人都藥到病除有網民仲留言話：「陳瀅BB，我病，我凍，點解你唔問候吓我？」仲問？因為你唔係佢男朋友囉！
玩埋求婚
最後一招，亦係大絕招，就係「失落時，會花盡心思引你一笑」，當男朋友有心事唔開心，做女朋友嘅Jeannie見到前面有間教堂，竟然話：「咦，有教堂喎，行快兩步」然後再回眸一笑話：「不如我哋結婚囉！」嘩嘩嘩！男朋友連求婚都慳番，就可以娶得女神歸，夫復何求！呢招真係絕招，網民個個都嗌頂唔順！
不過其實條片一開始就註明：「這只是假象，睇完就算」所以一班網民即刻醒晒，仲大鬧條片聖誕節流流先上載，居心叵測，仲話：「一係送陳瀅BB俾（畀）我，一係我罷睇！」
網民有話兒：
DXXXen XXu：短10年命都值。
黃XX：第一，我無女，第二，我未遇過呢種女，完。
王XX小：陳瀅BB，我病，我凍，點解你唔問候下（吓）我？
Baxx：有無搞錯？人哋無拖拍仲放呢啲片！
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|
