大美人李嘉欣（Michele）趁住聖誕節同老公許晉亨及囝囝，一齊去咗北海道過一個白色聖誕，原本係一件好開心嘅事，點知回程時遇到大風雪要滯留，加上國泰航空公司安排失當，搞到Michele足足滯留咗三日，由22號開始等機位，每次被航空公司通知去check in，最後都係失望而回，她以「難民營」嚟形容當時千歲機場的情況。令Michele最氣憤的是其他航空公司的乘客都飛走晒，Michele忍唔住喺微博開火：「我們在千歲機場等了3天，沒通知和安排，其他航空公司都飛了。」
連續四日辛苦經歷捱到頭暈暈
仍然滯留日本的Michele，今日接受東網電話訪問，直言一家人從未試過如此辛苦：「我哋今朝凌晨4點先離開機場，要搵車搵酒店，仲要係零下廿幾度，搞到朝早六點先有得休息，真係未試過咁辛苦嘅經歷！搞咗前後4日，國泰嘅安排真係非常之唔好，情況非常之混亂！」Michele表示頭兩日（22日、23日）天氣不穩要停航，她亦理解原因，但後兩日即使天氣好轉，仍未能安排旅客設港:「呢兩日都仲係好混亂，機場都好多小朋友、好多BB，大家都苦不堪言，又有人唔舒服，我都要抖一抖，我都有啲頭暈。」
自覺似難民：大家都好徬徨
嬲爆的Michele繼續轟國泰安排失當：「其他航空公司都已經飛咗，國泰依然冇提供食宿、冇安排，覺得自己好似難民咁，大家都好徬徨，國泰嘅安排好失當！呢幾日都係國泰叫我哋去機場等，實在有太多旅客要上機，跟住排隊排咗好多個鐘先通知冇得飛，國泰呢個安排的確有商榷嘅餘地。」
問到囝囝有否被混亂情況嚇親？Michele指囝囝冇喊，更大讚老公許晉亨在如此混亂的情況下，仍能保持鎮定，帶領一家人及同行友人，令她覺得很安心。
忍不住淚灑機場
Michele又大爆其姐姐亦到日本過聖誕，家姐的小朋友亦有同行，家姐由香港飛東京，同樣不能飛，更被困在機艙內十多個小時，最後仍要原機飛返香港：「我都有同家姐Facetime，諗到兩姊妹都咁慘、咁無奈，都忍唔住喊。」
等足三日仲未有得飛
另外，東網亦聯絡上Michele助手Koko，她透露Michele一行七人由22號開始，每天都到機場查詢航班消息：「尋晚一早就已經去到機場等，去到深夜國泰先通知話冇得飛，等到凌晨4點都係返唔到香港，國泰嘅安排非常混亂。唔止香港嘅旅客，就連其他國家嘅旅客都深受其害，成個櫃位都係得兩個職員！」Koko又表示見到現場有身患長期病患嘅旅客，等到連藥都食到冇晒。
買定乾糧畀囝囝 大人照捱餓
Koko續表示現場冇水冇食物，眾人到機場內的餐廳排隊買食物，排足三、四小時仍未能購買食物，最後更排到餐廳關門，即使有很多人表現鼓譟，但仍無可奈何。問到Michele囝囝情況如何？Koko說：「22號係機場等嘅時候已經試過一次，冇水冇食物，大家又飢又渴，知道情況咁混亂，所以尋日預備定乾糧畀佢，大人就捱吓，都唔知幾時可以返到香港。」
__________________________
想聽歌？想睇MTV？想了解本地Indie Band資訊
快啲click入「聲大夾樂」專頁： http://on.cc/musicon
|
鍾意就快D Share啦！
|
|
|