冬天嘅北海道，係唔少藝人放假嘅旅遊熱點，但北海道日前發生50年一遇嘅大風雪，原定22日返港嘅大美人李嘉欣同老公許晉亨、囝囝Jayden被逼滯留喺千歲機場，缺水缺糧如同走難一樣。(新聞連結：http://bit.ly/2hopFnw )同樣喺正呢幾日，型男方中信就抽時間陪老婆莫可欣、8歲幾嘅囡囡符迦晴，趁聖誕假舉家出埠去北海道滑雪，但遇正今次大風雪，唔少人都擔心佢哋嘅安全問題，今日，莫可欣就以短訊向大家報平安，指一家人喺下晝已經搭內陸機，飛咗去東京。莫可欣表示：「去到機場的確好混亂，我哋係自駕嘅，沿途啲路都幾危險，見到有架車翻咗，我自己過馬路時，就撻咗生魚。我哋都係睇報紙先知機場嘅情況，開頭都好擔心，噚晚打咗去航空公司問有冇取消航班，咁可能我哋搭內陸機，所以情況好少少，只係delay咗一個鐘！」莫可欣指聽日一家人會返香港，不過即日再飛蘇梅島：「其實唔計大風雪，北海道係一個好靚好靚嘅地方，咁當然滯留喺機場嘅人係好慘，而我哋出發同走嘅日子，啱啱避晒最麻煩嗰幾日，所以都覺得好好彩！」另外，恒生新抱何倍倩同老公何乃斌，帶埋大仔同龍鳳胎去咗北海道，佢哋原定喺23號搭國泰航班返港，不過因冇機返，繼續留喺當地過聖誕，不過就好彩有酒店容身，唔使滯留機場。何倍倩今日回覆《蘋果》時表示：「謝謝！不好意思，這幾天較累，不方便回應。很感動在這日子也收到你們關心訊息。我沒有在機場等，因那裏較混亂。真的謝謝你們，祝聖誕快樂。真的真的真的不好意思，希望明白。」至於歌手吳雨霏（Kary）原來喺前日同老公洪立熙（Brian）出發到北海道，佢哋喺前日經東京轉機上札幌，但受到天氣影響航班，最終要轉陸路北上。Kary今日被問到行程有冇受影響，佢以短訊回覆《蘋果》時表示：「有，本來係東京飛去北海道，但所有航班取消，喺機場滯留5個小時，最後要坐子彈火車再自駕先到北海道。」同樣去咗北海道過聖誕嘅，仲有靚媽童愛玲，佢連日嚟喺Instagram度貼相，透露自己去咗大通公園睇燈飾，跟住又去咗滑雪，仲落咗二世古嘅hashtag，睇嚟行程同心情都冇受暴雪影響。
|
鍾意就快D Share啦！
|
|
|