《致命復活》播到本月19號就大結局，劇情緊張一輪又鬆番，朱晨麗擺位唔知係點，王浩信嘅創傷後遺症除咗頭幾集外好似已經不藥而癒，劇本支線多，但有啲兜圈，令人搞唔清楚條伏線喺邊……。星期二晚一集更明顯係越南風景介紹，倒帶講番郭晉安、萬綺雯、黃德斌三個究竟點識，仲有就係何雁詩帶王浩信坐摩天輪，何雁詩仲要講到自己同管理摩天輪個經理好熟，私人醒佢同王浩信兩個免費包場………現實中應該冇可能啩？不過咁，前晚嗰集《致命》其實都洩露咗一啲玄機，就係傳到好勁嘅big boss——謝雪心同王浩信嘅母子關係———眉頭眼額有啲古怪。前晚嗰集係講于洋透過舊情人幫手介紹個job俾王浩信間公司「繼才」，王本來唔知，係同佢不和嘅細佬兼公司揸fit人黃嘉樂踢爆，兩父子一言不合，又不歡而散。平時會勸交嘅心姐竟然今次冇出手，而且個樣仲有啲花生添……之前有傳，心姐先至係big boss，因為王浩信係于洋同舊情人所出，唔係佢親生，只有黃嘉樂係佢親生，所以十年前就搵人綁架王浩信、想除口眼中釘，扶植自己個仔黃嘉樂上位，點知誤中咗郭晉安……到星期日呢集，心姐係咪big boss，就會揭曉。
o依家可以穿少少俾大家知……其實心姐真係有古怪。
佢心裏面，真係有一個不可告人嘅秘密。
想睇拉落去……心姐嘅秘密就係，
王浩信係佢個仔；
黃嘉樂都係佢個仔；
但，黃嘉樂同王浩信係同母異父。嚟緊劇情發展到于洋發現黃嘉樂做手腳，利用公司資源為自己賺錢。于洋一怒之下趕佢走，未幾于洋就心臟病發。成個過程唔知點解被拍下……心姐要求王浩信返公司幫手，但黃嘉樂竟然變本加厲，迫走晒公司所有老臣子，王浩信死都唔肯返去，於是心姐向王浩信爆大鑊……于洋又心臟病發………
係咪潘志文出場嘅時間？
| （《致命復活》劇照） | | |
| |
|
鍾意就快D Share啦！
|
|
|
