(新增呂麗君回應)坐擁逾1,600億資產的華人置業前主席劉鑾雄（大劉），上個月18日被發現喺香港入紙跟細自己28年嘅女友陳凱韻（甘比）排期結婚。《蘋果》收到獨家消息，原來日前兩人已於高士美道大宅，由律師見證下簽紙，正式成為合法夫妻，同甘比鬥足十幾年嘅呂麗君可謂全盤輸晒。致電甘比恭喜佢成為劉太，佢話：「多謝！多謝所有祝福我哋嘅人！」問佢係咪前日正式簽紙結婚，當時在場有乜親友見證？佢話：「簽紙過程唔想透露，請容許我哋保留一啲私隱！」可有收到甚麼結婚禮物？佢就話:「冇喎!」雖然講就咁講，但結婚前幾日，其實已有報道稱，甘比以10.5億向華置購入肇輝臺12號、共24個單位，據知其實係大劉俾錢，咁算唔算係結婚禮物呢？(新聞連結: http://bit.ly/2hfFtrZ )咁多年嚟，喺大劉身邊嘅女人無數，除了已故嘅前妻寶詠琴外，大劉一直未有再婚打算，問甘比正式成為劉太有乜感受呢？她稱話：「正如劉生之前所講，幾年前已有計劃結婚，所以冇乜特別大感受，生活一切如常！現在正式成為劉太，我好開心，亦好珍惜將來同劉生嘅每分每秒，希望一家人開開心心！」咁會唔會補辦婚禮高興下？佢話：「暫時冇呢個打算，一切等佢養好個身體再講！其實亦要多謝劉生的一班朋友同我自己的一些閏密，他們好似比我們更開心，有些閏密聽到呢個好消息仲開心到喊！」其實劉生咁多年嚟有冇做過乜嘢令你好感動別！佢話：「劉生其實係一個感情豐富及細心嘅人，有時候好多細微嘅事都會令人感動嘅！好難特別舉例子！」至於呂麗君對於大劉正式同甘比結婚，就表示不予回應。
|
鍾意就快D Share啦！
|
|
|
