分手18年後同台合唱基嫂𥄫實 千嬅攬中基尷尬甩嘴：冇試過咁驚
鄭中基和舊情人楊千嬅分手十八年，兩人各自男婚女嫁組幸福家庭，前晚他開騷邀舊愛任嘉賓，基嫂余思敏在台下𥄫實，千嬅老公丁子高卻沒捧場。平日口若懸河、表現風趣的鄭中基，對着舊愛卻尷尬到口窒窒，千嬅與鄭中基合唱《製造浪漫》時亦兩度甩嘴，事後高呼：「做咗二十年都冇試過咁驚！」合唱後，二人握手兼世紀擁抱。
【世紀抱抱】
■曾經是無賴的鄭中基前晚請舊愛楊千嬅做嘉賓，變緊張大師的他說話口窒窒，合唱後跟千嬅握手兼擁抱。
■千嬅在台上頻頻喊驚，緊張到左右不分笑到踎地，鄭中基一臉尷尬。
■基嫂余思敏前晚帶囡囡捧場，坐第一行靚位支持老公。
■千嬅與鄭中基再見亦是朋友，在Ig貼二人的後台合照。互聯網圖片
現年44歲的鄭中基曾經是情場浪子，苦追千嬅三年並作曲示愛，於1999年疑因張栢芝介入分手，2010年被爆跟蔡卓妍秘婚又離婚，翌年與有線前主播余思敏奉女成婚，曾唱《無賴》自嘲的他，前晚假紅館舉行第三場「PLAY IT AGAIN世界巡迴」演唱會，竟然請到舊愛楊千嬅做嘉賓，兩人繼四年前在香港電影金像獎碰頭後，前晚再度合體，今次在台上合唱，基嫂余思敏和囡囡坐第一行睇騷，千嬅的媽咪和弟弟亦有捧場，而前妻蔡卓妍則去嫲嫲屋企拜年，昨日更離港去旅行。
千嬅於安哥環節壓軸登場，與鄭中基合唱《製造浪漫》時兩度甩嘴，她說：「我好驚呀！做咗二十年喺紅館都冇試過咁驚，成個耳機壞咗，裏面有一村人唱歌，𠵱家喺海拔四千幾呎，有冇人幫我急救？」鄭中基對她說：「你頭先應該叫停吖嘛。」千嬅反駁說：「個場唔係我，我唔敢嗌停，我要好專業。」鄭中基說：「你係烈女嚟㗎嘛。」千嬅取笑：「你仲敢提烈女？你噚晚賴嘢喎！」
■鄭中基前妻蔡卓妍前晚去嫲嫲屋企拜年。互聯網圖片
自嘲左右不分之後千嬅忙着戴耳機，研究應戴左耳還是右耳，鄭中基即說：「應該右。」千嬅自嘲：「死嘞，年紀大，左右都分唔到，真係淒涼。」隨即辳爆笑到踎地說：「呢個助聽器輔助我唱歌，真係撞鬼，啋啋啋，今日年初二。」未知是否對着舊愛很緊張，鄭中基說錯前晚是最後一場，千嬅愕然反問：「吓，聽晚唔係開騷咩？」他即兜：「聽晚叫加場。」
鄭中基之後向千嬅鞠躬致意：「我要多謝你，年初二都嚟。」千嬅笑問：「我想知道你做乜咁大膽搵我呢，你碌到張卡咁大點還呢？」鄭中基口窒窒回應：「我…我…我預咗會還嘅。」千嬅說：「我哋可以攤好長還款期，我幫你諗埋點還，記得上次見你喺金像獎頒獎畀你，你致謝詞講：『將自己最叻嘅嘢放低唔做去拍電影。』如果你想還畀我，不如攞番自己最叻嘅嘢，將你嘅歌當還番畀我戲唔使拍得多，最緊要中！」
原本流程安排千嬅唱完即下台，她卻問：「搵我嚟淨係唱半首咋？」觀眾掌聲如雷叫安哥，鄭中基尷尬說：「我唔夠膽要求嘛。」之後兩人再合唱《閉目入神》，千嬅又說自己很驚要飲水，唱完兩人握手擁抱，鄭中基在千嬅落台後定一定神說：「唱完成個散咗！採訪：王連連
攝影：仇志德
|
鍾意就快D Share啦！
|
|
|
