鄭中基尾場嘅嘉賓一直都係呢個演唱會嘅重點，噚晚出場就係子華神黃子華，黃子華同Ronald喺電影合作過，早年Ronald同陳嘉上聯合執導電影《神秘寶藏》，子華就扮張保仔，兩個就成為咗好朋友，所以噚晚就現身做嘉賓。子華神着住西裝插住袋出場，觀眾尖叫成分鐘，子華神先可以開始講嘢：「大家放心，鄭中基係出咗去門口，去鬧啲一嗌Encore就走嘅人。Encore點解叫Encore呀？係會嗌N咁多次㗎。佢o依家出 ...
鄭中基尾場嘅嘉賓一直都係呢個演唱會嘅重點，噚晚出場就係子華神黃子華，黃子華同Ronald喺電影合作過，早年Ronald同陳嘉上聯合執導電影《神秘寶藏》，子華就扮張保仔，兩個就成為咗好朋友，所以噚晚就現身做嘉賓。子華神着住西裝插住袋出場，觀眾尖叫成分鐘，子華神先可以開始講嘢：「大家放心，鄭中基係出咗去門口，去鬧啲一嗌Encore就走嘅人。Encore點解叫Encore呀？係會嗌N咁多次㗎。佢o依家出咗去叫我上嚟頂一陣，我一向對唱歌嘅人有一個好大好奇心，點解成日唱歌就走埋去握手掗時間㗎呢？我自己從來未試過，好想去試下，我想做一個實驗，我o依家同你握，你嗰邊啲人係咪覺得好討厭吖？握到極咪握廿個，呢個仲唔握嘅O添，花晒時間喺呢一邊，你後面嗰啲覺得討唔討厭呀呢個行為？但係新年要做㗎，有利是㗎嘛，點解Kelly有，我就冇？」子華神又話：「我就講一句咁多啦，有關鄭中基，呢個奇人嚟㗎，大家覺唔覺得呀？大家知道一個歌手唱情歌，係唔可以亂食嘢嘅，但係鄭中基呢咩都放落口嘅，唔係講一般嗰啲煎炸嘢呀，即係你做唱情歌嘅人，你一定要形象㗎嘛。」呢個時候大家真係唔好亂諗嘢，子華神真係講緊食物啊，唔好諗錯隔籬，子華神話：「你冇見過張學友拎住條臘腸當波板糖咁咬。即係你見佢唱《每天愛你多一些》，愛咩呀？臘味呀？你有冇見過張國榮食牛雜吖？冇㗎嘛！『風繼續吹，嘩！吹凍晒！不忍遠離，心裏亦渴望留下食到尾！』咁呀？鄭中基係食過牛歡喜㗎！一個食過牛歡喜嘅人點可以唱情歌呢？」可能大家唔知牛歡喜係咩，即係牛嘅陰部，鄭中基喺電影《低俗喜劇》入面，演嘅角色暴龍哥好鍾意食。講完之後子華神就扮鄭中基唱歌：「讓我為你哭。咁呀？哭咩呢你咁歡喜。」一唱完子華神就意識到台下有小朋友，佢就話：「有啲人唔知咩係牛歡喜，有細路喺到o添，大鑊喇，向你隔籬個位解釋下啦。牛歡喜就喺一個地方，啲公牛好鍾意去（全場大笑），喺瑞士。任何人都唔咁樣可以食過牛歡喜再唱情歌，只有鄭．中．基。」
